【澳門好去處】廣東話愛好者必買「鳩里」！昉工作室DIY迷你3D澳門場景模型！縮小版葡式街牌／當票／大三巴／坑渠蓋

香港原創度高嘅文創精品店愈趨罕有，反而澳門就可以見到唔少原創精品店，好多間都值得情侶拍拖兩個人逛一逛。今次E.A.Two走到其中一間澳門文創精品工作室，精品造型細緻獨特，充滿澳門歷史及葡式風格，簡潔精美，CP值頗高！

距離「瘋堂斜巷」不遠嘅「昉．工作室」，雖然座落小街道內，但同「澳門大三巴」亦不足10分鐘步程，地理位置上亦算便利。即使徒步至「禮記雪糕」，亦只需3分鐘步程。

「昉．工作室」門口有一面五顏六色嘅郵箱牆，鮮艷奪目，轉角口更有一個古色古香嘅「澳門大三巴」模型，打卡味濃！而該店正正係一間創意設計工作室，製作澳門特色模型產品、自家文創產品，全部都係以濃縮模型方式呈現，大部份精品都係一手能夠掌握！

從店內可見唔少澳門場景模型，以及濃縮成迷你版嘅比例模型，都係由現代3D打印而成，再用人手上色，充滿澳門特色，而且符合澳門歷史文化。而該店於今年3月先搬遷至「水井斜巷」內，地方寬敞，基本上只係於中間同牆邊擺放所售賣嘅精品。

一端有色彩繽紛嘅迷你郵箱，另一端亦有大量唔同街名嘅迷你葡式街牌。店內有好多葡式建築物精緻模型，你呢度又去過幾多個澳門景點呢？連歷史建築「德成按」招牌都活靈活現，該典當舖現址為「典當業展示館」。店內最新連迷你當票都有，如果去「典當業展示館」，不妨買張「當票」做紀念啦！

另外，亦有迷你巴士站牌、迷係紅色郵筒、迷你綠色垃圾筒、迷你燈箱等，連迷你坑渠蓋都如實呈現，分為圓形、方形及長形設計，造型精緻！

店內唔單止有迷你古色大三巴、迷你街牌，除咗「大三巴街」、「戀愛巷」、「澳門街」、「十月初五日街」、「天神巷」、「情人街」，亦有各式騎呢街名，包括「西瓜里」、「芒果街」、「鹹魚街」、「仙女巷」、「幸運圍」、「養豬巷」等，連廣東話愛好者必備嘅「鳩里」都有！

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭巴士路線2A、7、8、8A、9、9A、12、18、18B、22、25、25B、H2至「塔石體育館站」落車，折返大三巴方向，徒步約6分鐘即達。該店距離「禮記雪糕飲冰專家」僅有約3分鐘步程。

❷ 只要上IG打卡，就可以獲得一個迷你鐵製郵箱，小郵箱只有一隻手指頭咁大！

❸ 店內以老式精品為主，例如典當業精品、模型、迷你街牌、巴士站牌、迷你郵箱、雪櫃磁貼，以及澳門特色建築裝飾品等。

❹ 店內有一隻小貓，要小心唔好俾小貓跑出店外。