【澳門行山】經斜行升降機！一星路線、4000米大潭山環山徑俯機場全景／心形濕地／路氹城

E.A.Two曾經帶大家上過大潭山斜行升降機，經過光復街後就能夠直抵瞭望台。而穿過瞭望台，更可以前往大潭山4000米嘅環山徑，全程為一星路線，簡單易行，沿途既可俯視心形濕地、路氹城，亦能近距離環瞰澳門機場全景，適合情侶拍拖兩個人散散步！

而「大潭山」其實係一個郊野公園，座落知名嘅「龍環葡韻」及其濕地背後，只要到湖水綠色建築物後面，經過「嘉模泳池」及「光復街」。穿過天橋後，再搭上斜行升降機，即達「大潭山瞭望台」。從瞭望台俯視，既可望下方嘅「龍環葡韻濕地園區」，亦能眺望繁盛嘅路氹城賭場群風景。

從瞭望台俯視，其實已經能夠俯視心形濕地，不過就未算正面嘅心形。而上行至「大潭山環山徑」，初段則可以較正面方向俯視「龍環葡韻」心形濕地，打卡必到！

好多人走「大潭山環山徑」都係從左面入口出發，即近公廁嘅入口，路段會較少微斜，但其實左、右兩端入口基本無太大分別，走到最後都係由另一端入口折返。今次我哋由環山徑右面入口起步，最先嘅景觀就係心形濕地，最初有一段小山路可以通往氹仔最高點！折返環山路，其後接連就係「香港科技大學」、「科大醫院」。然後，可以從環山徑環瞰整個「澳門國際機場」景色，飛機升降景象一覽無遺！

「大潭山」雖然感覺係澳門頗高嘅山峰，實際上最高點海拔僅有約160.4米，只係等同於好多香港市區快靚正登山點。該路線於1987年開放，係氹仔最早期嘅行山徑。穿越環山徑，整條步行徑會經過雞頸馬路、嘉樂庛總督馬路及司徒澤雄神父馬路嘅山路，中途亦會見到有唔少休憩設施，據悉當中更有一個小型滑草場呢！

穿過俯視機場全景嘅一段之後，走上樓梯捷徑，就會去到休憩公園，然後經過馬路去另一邊山路。另一邊景色較少，山下甚至有墓園，大部份景觀都被林林遮蔽，只有少量位置或涼亭可以望向海景及「友誼大橋」。另一端其實係「澳門城市大學」方向同花城區，好快就可以折返公廁入口，走完全程只需約1小時。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 大潭山郊野公園內有小型滑草場。

❷ 經大潭山斜行升降機可以直達瞭望台，後面就係大潭山環山徑。

❸ 乘搭巴士路線15、21A、25、50、50B、56、MT4、N2、N3、N5、N6至「氹仔CEM貨倉站」，落車搭電梯上行即達大潭山瞭望台，後面就係環山徑出入口。

❹ 雖然路線簡單，但都要記得準備充足食水。