【澳門美食】鮑參翅肚二人餐要呢個價？潮州菜館天潮醃螄蚶有驚喜門面難搵係弊病？

情侶拍拖兩個人去澳門快閃遊，如果想食魚翅，甚至鮑參翅肚，唔少人都會揀出名嘅「譚家魚翅」、「阿一鮑魚」、「魚翅撈飯專門店」等。今次經朋友帶領，前往距離「澳門漁人碼頭」不遠嘅潮州菜館，原來都可以一次過食鮑參翅肚，但就要MOP888，到底呢個價食呢啲，值唔值得食呢？當然，呢方面就由讀者自行決定。

若非同行有人帶領，編輯點都唔會進入呢間餐廳，皆因門面極狹窄，而且唔明顯，根本難以見到。況且，從來未聽過「天潮」呢間餐廳，連門面設計都有一種難以吸引嘅感覺。上行樓梯，發覺樓下茶記有唔少客人，但樓上餐廳座位則空無一人。室內嘅大理石牆壁、地板，都令人感覺想走高檔路線，中間甚至有3個鳥籠設計嘅座位，整體係將中式同現代風格融合，連檯面都係以中式器皿為主。

原來「天潮」意指既係「潮流」，亦係「潮州菜館」，主打係潮州菜，以及新式菜式，感覺似私房菜。簡單嚟講，即係潮州打冷，例如凍蟹、滷水小食，每碟由MOP98起。前菜有小碟涼菜，亦可自選茗茶。實試咗一款天潮醃螄蚶MOP98，頗有驚喜，螄蚶每隻都頗大隻，入口爽脆滑嫩，配搭調配過嘅醬汁特別出色，內有蔥、辣椒、芫荽，重有蒜香、醋香，略有微辣，混合起嚟好配合螄蚶。

店內有一人餐及二人餐可以選擇，石鍋翅一人餐MOP198、乾鮑一人餐MOP298、石鍋翅二人餐MOP458、佛跳牆二人餐MOP888。今次選擇佛跳牆二人餐，套餐包含有每位一盅迷你佛跳牆，潮式海味煲、白灼時菜、健脾小米，值唔值價就見仁見智。

佛跳牆內係一盅湯，內有鮑魚、花膠、魚翅、海參、雞髀肉、杞子，一盅係一人份量，每樣基本都係得一件，除咗杞子。不過，海參軟嫩、鮑魚彈牙、花膠軟滑，魚翅亦算係一梳梳似裙翅口感，只係每人得一小撮。湯頭係不俗嘅，的確係有各式海味嘅味道，但一盅份量其實唔算多，只係一小碗湯水左右，都算係迷你版女士美容湯！

而潮式海味煲內有花膠、冬菇、白玉菇、蟹味菇、蝦乾，第一啖感覺惹味，第二啖之後就愈食愈鹹，因為醬汁較重，一定要撈飯，真係好鹹！至於所謂嘅健脾小米，其實即係平時香港大排檔嘅黃金炒飯，以蛋炒飯加生菜絲，好夠蛋味，但唔夠乾身，鑊氣就爭咁啲啦。最後係油菜，即係生菜，用油浸咁款嘅生菜，所以真係比較油膩。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 付款方式接受Visa、Master、現金、銀聯。

❷ 店內有收加一服務費。茶位每位MOP8，可以揀鐵觀音、香片、菊花、龍井、普洱、羅漢果。

❸ 該店距離澳門科學館僅有約7分鐘步程。乘搭巴士路線3A、3AX、5X、8、12、17S、60、N2至「新口岸/文化中心站」，徒步約4分鐘即達。

❹ 樓下「太陽冰室」同「天潮」係同一間集團，下面係茶記模式，上面就係食貴嘢。