隱身中央圖書館背後！Dream浪漫西餐廳「世一」焦糖燉蛋／風乾黃油雞／紅菜頭刈包

情侶拍拖兩個人好多時都想搵間浪漫、有水準，價錢又唔太費嘅西餐應撐檯腳，今次E.A.Two前往一間隱身於酒店內嘅平價西餐廳，菜式獨特，大廚有功力。不過，該店只限會員，即睇簡單入場方法！

「Dream」於上年10月底開業，有午市同晚市提供，星期六、日及公眾假期中午更有專用Brunch Menu，供應時間為12:00至16:30，價格由$118至$138不等，餐牌內甚至寫明不添加味精。有讀者曾經推薦黃油雞，原來即係烤風乾黃油雞配自家製蔥油醬$398，感覺好吸引，但並非Brunch Menu內。

座落窩打老道背後嘅「Dream」，毗鄰九龍中央圖書館、YMCA，隱身於酒店「峰景軒」入面。該店表面似一間酒店Cafe，其實係一間西餐廳，而價格同一間Cafe價錢差唔多，CP值高！不過，呢間西餐廳係行會員制，只招待會員，但其實進入餐廳時都可以即時做會員，只要填寫簡單資料就可以成為會員。

Brunch Menu內有7款菜式可以選擇，包含有Caesar Salad配手撕雞$118、Carbonara$128、辣肉醬忌廉芝士意粉$128、韓式泡菜豬腩Risotto$128、香蒜鮮蜆意粉$138、西班牙薯仔流心蛋$138。另外，最特別嘅地方係重有一款Brunch Special，每次都有可能唔一樣，當日午餐就係一款紅菜頭台式雞排蕃茄刈包配沙律菜。

韓式泡菜豬腩Risotto係一款驚喜有水準嘅菜式，除咗意大利飯同泡菜醬汁融合，醬汁creamy，飯粒並非硬身，泡菜汁令意大利飯帶有辛辣感，但又真係幾開胃。而豬腩肉先係意想不到嘅地方，肉質係黏身，而唔會油膩，要做到黏嘅口感絕對唔容易。另外一款係Special Menu，紅菜頭台式雞排蕃茄刈包，旁邊伴有沙律菜同沙律醬，內餡有雞排、蕃茄、青瓜、沙律菜，大廚整台式刈包時同時加入紅菜頭汁，所以成塊麵包染成紫紅色，而麵包滲出啖啖菜汁微甜味。

店內唔單止地方寬敞，左右都係落地玻璃摺門，室內不時重有文創市集之類活動，更有香港插畫師嘅作品展覽，可見該店同時係尊重原創嘅餐廳。插畫唔單止有獅子山等畫作，亦有奧運代表嘅畫像。至於飲品，雖然有咖啡或茶，但無套餐可擇，所以飲品需要另叫，有熱飲有凍飲，朱古力咖啡$44、新鮮時令水果茶$42，Fresh Fruit Tea，來自於鳳梨、香橙、蘋果，上面再加上薄荷葉，將水果打磨成蓉﹐好似果汁，但又同時保留返果肉，質感趣緻。

甜品慢煮法式焦糖燉蛋$80至$90、比利時朱古力心太軟$80，新鮮雲呢嗱芝士蛋糕$80，伯爵茶戚風蛋糕配焦糖脆脆及芝士海鹽奶蓋$128。4款入面最新奇有趣嘅係慢煮法式焦糖燉蛋，同一般焦糖燉蛋一樣表面有層脆脆焦糖。不過，內餡的確唔一樣，有種軟綿感覺，似奶凍、布甸，又似mousee。焦糖層雖然厚，脆得有聲，但焦糖加埋燉蛋，甜度又好似無一般無糖燉蛋咁甜膩，原來慢煮即係keep住燉蛋嘅溫度，呢款焦糖燉蛋直頭可以叫「香港世一」！