消失的海景Starbucks、藝術小天地、白色旋轉木馬？高雄西子灣探索駁二藝術特區／國立中山大學／打狗英國領事館夕陽賞景地

西子灣係情侶拍拖兩個人必逛嘅地區，內有唔少知名景點，當中有藝術特區，亦有大學同打狗英國領事館，皆為黃昏日落賞景之處。不過，其實西子灣本身重有幾個必遊地標同打卡點，但現時3個景點已經消失得無影無蹤，到底呢3個地方本身係咩嚟？

西子灣景點（1）﹕駁二藝術特區

近年，西子灣內嘅「駁二藝術特區」一度成為網紅打卡熱點。所謂「駁二」，其實即係高雄市內接駁碼頭嘅第二號倉庫，分別指卸載貨運同其倉庫編號。呢個地方本來只係一個充滿歷史痕跡嘅古舊倉庫，被加上各種藝術文化之後﹐展現創意同夢想。該藝術特區鄰近高雄港第二號接駁碼頭，不時有各式文化或藝術展覽，甚至舉行音樂會。只要乘搭水岸輕軌，就能直達「駁二藝術特區」範圍，交通便捷。

呢個舊倉庫座落鹽埕區，原本係高雄港倉庫，設於1973年，只係用作儲存魚粉、砂糖，後來曾經被遺忘及丟空；但由2000年至今，已蛻變成新世代藝文世界。倉庫分為大勇倉庫、蓬萊倉庫、大義倉庫，週邊唔單止有展覽及表演，亦可見各式藝術壁畫、裝置藝術，打卡必到！「駁二藝術特區」係台灣其中一個成功轉型嘅文創園區，亦係高雄人嘅文創基地。

「駁二藝術特區」內有唔同倉庫，剛才提到大勇倉庫、蓬萊倉庫、大義倉庫，每個都有唔同景點，其中大義倉庫就有假日市集同裝置藝術等，大勇倉庫就有駁二塔可以賞景，蓬萊倉庫就有哈瑪星台灣鐵道館可以參觀同坐小火車繞圈。

西子灣景點（2）﹕國立中山大學

至於「國立中山大學」，其實只係台灣高雄鼓山區一所知名大學，特別在於從西子灣穿梭一道西子灣隧道之後，方才抵達大學範圍。而大學唔單止背靠西子灣壽山國家自然公園，週邊都係黃昏日落賞景地，可以觀賞夕陽斜照，一端更有一個小沙灘。

西子灣景點（3）﹕打狗英國領事館文化園區

西子灣內嘅高雄捷運「哈瑪星站」附近，可見一座由高雄港車站改造而成嘅「舊打狗驛故事館」，現時已變成展覽空間。而西子灣山上就另有一個「打狗英國領事館」文化園區﹐門票人均為TWD99。

「打狗英國領事館」文化園區係一座台灣當地僅存嘅西式近代建築物，位於小山崗之上，來自於英國政府嘅首座領事館。該館建於1879年，歷史悠久，內有山上領事館官邸、山下領事館辦公室、登山古道等，近年已成為國定古蹟之一。該園區係黃昏時份另一個賞景好地方，夕陽風景一覽無遺！

西子灣消失景點（1）﹕小天地 Skyland 翻新藝術空間

毗連「鼓山輪渡站」，原來有一個小型藝術空間，以「小天地 Skyland」命名，設於2019年7月。該建築物由漁會老房改造而成，經翻新後一度成為網紅打卡點。室內設有無邊際小型波波池，感覺夢幻，而一端大窗戶亦可以觀賞碼頭海景。當中，亦設有自由空間，以及色彩繽紛嘅藝術品「捕夢網」，遊人可以自由進出參觀。不過，近年呢個迷你藝文空間已經消失，據悉於2020年10月已經結束營業，所以而家去已經唔會再可以見到。

西子灣消失景點（2）﹕棧貳庫KW2 白色旋轉木馬

而「棧貳庫 KW2」就毗鄰「駁二藝術特區」，本身亦係來自於日治時期嘅倉庫，有過百年歷史，倉庫本身用作儲存紅糖，週邊保留歷史韻味。而近海旁位置本身有一座非常有現代感嘅純白色旋轉木馬，一度成為該區網紅IG打卡點。不過，現時呢座充滿現代感嘅白色旋轉木馬就已經消失，據悉於2023年底正式結束營業，由2018年7月至2023年12月，於海灣屹立有超過5年光景。雖然無咗一座打卡白色旋轉木馬，但令倉庫頓時由現代感變返歷史感。

好多人近5年前往「棧貳庫 KW2」，都係朝住呢座純白色旋轉木馬為目標，但其實呢座倉庫都係別具特色同意義。「棧貳庫」本身建於1914年，曾經歷日治時期發展，唔單止用作儲存砂糖，以及運輸出口，後來於60年代亦係鐵路轉海運用途。老倉庫依然可見其老窗框及老牆壁，簡樸自然。

西子灣消失景點（3）﹕西子灣海景Starbucks

另外一個於西子灣一帶消失嘅景點為連鎖咖啡店Starbucks，該咖啡店本身係高雄最美星巴克。不過，據悉該店於2022年9月底已經結束營業，當時消息一出之後，唔少高雄人都大嘆不捨。

呢間西子灣Starbucks座落西子灣海旁，樓高2層，無論下層定上層，都係正對海景，咖啡室大窗戶透視無敵海，風景一覽無遺，黃昏時更可以望到夕陽餘暉。當時一邊飲咖啡，一邊望住個海，真係特別Chill，非常浪漫，旅行簡簡單單已經能夠感到幸福。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭高雄捷運橙線至「西子灣站」，於2號出口出站，或者「鹽埕埔站」至1號出口出站，同樣可達「駁二藝術特區」，步程約5分鐘。而高雄輕軌則可以至「駁二蓬萊站」或「駁二大義站」落車，直達「駁二藝術特區」。

❷ 乘搭高雄捷運橙線至「西子灣站」 2號出口，或者高雄輕軌至「哈瑪星站」、「駁二蓬萊站」，都可以直達「棧貳庫 KW2」。

❸

❹