【花蓮景點】日式庭院背後藏小型動物園！張家の樹園可體驗傳統和服秒達京都

花蓮日式建築物不少，除咗知名嘅「吉安慶修院」，另一座日式庭院「張家の樹園」亦係受歡迎嘅觀光景點，前端以日式庭院設計，而後面則有如一個小型動物園，適合拍拖兩個人去逛一逛！

座落吉安鄉嘅「張家の樹園」，以日式庭院造景為主，唔單止設有日本九尾妖狐鳥居裝置，更有日式拱橋、手水舍、廟宇、拉車、透明水晶球韆鞦等，適合鍾意打卡嘅朋友。庭院內更可租借日式和服，重有狐狸面具，唔使去國外都可以拍攝日本風格嘅相片。

整個庭院表面空間不大，水池同草地一眼睇晒，其中有櫻花樹、御守洗等，恍如一個小型日式小鎮，設計唯美。而中間就有一間咖啡店分隔開，原來咖啡店背後重有一個隱藏動物園！穿過咖啡店，打開門口會發現一隻又一隻小動物映入眼簾，而且並無任何圍欄，各小動物同人群可以直接交流互動，唔少人都乘機餵食小物動。

咖啡店背後貫徹日式庭園風格，加上灰白碎石構成走廊，以及多個日本元素搭建而成嘅園區。只不過當中多咗一埋小動物，包括梅花鹿、山羊、兔子，重有浣熊、狐蒙、土撥鼠等，恍如一個花蓮迷你動物園！

門票每人有TWD150可以用作消費，換言之即係可以點選TWD150內嘅飲品，基本上除咗TWD280嘅定食之外，茶類、咖啡、冷泡茶、果汁、糕點都可以唔使加錢，但每人只可以揀一款。今次E.A.Two兩個人只係揀咗一杯綠茶、一杯紅茶，逛完整個庭院之後，飲杯嘢再relax吓亦甚悠閒。不過，如果想堂食或坐低嘅話，進入日式榻榻米座位必須要先除鞋喔！

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 張家の樹園並無停車場，但可以停車喺街邊，白線內就可以停車。

❷ 門票人均TWD200，其中有TWD150可以入園消費作抵銷，120cm以下人均則為TWD50，而只要憑門票就可以當日重複出入園區，門票重會附送紅蘿蔔飼料。

❸ 如果17:00之後後入園，就無需購買門票，不過每人就有最低消費TWD150，小朋友就無最低消費。付款方式接受現金。

❹ 入園可以租借和服，包括有大人同小孩尺寸，連日本和服嘅髮飾、木屐都有。