高雄旗津島7大景點、旗津小食！實試電動車租借體驗！

高雄旗津島係高雄人氣景點之一，長形小島雖然可以經陸路前往，但最方便情侶拍拖兩個人嘅路線始終係經渡輪從海路前往。旗津有多個人氣景點，今次E.A.Two就實試租借旗津島內嘅電動車，遊走當中7大景點，到底徒步定租單車或電動車好呢？

關於旗津

旗津島地方不大，從地圖上可見係呈狹長形，座落高雄市西南面。整個旗津區鄰近高雄港、鼓山區、前鎮區、小港區，以前其實又叫做「旗後」、「沙洲半島」，本身係同台灣本島相連，後來因為要興建高雄港第二港口而變成一個小島，其後再靠一道海底隧道相連。整個旗津漁港最大特色就係海風、賞船同海產。

旗津景點（1）﹕旗津老街

甫抵達旗津渡輪站，馬上可達「旗津老街」，而旗津嘅天后廟則有超過300年歷史，並早於1979年被列為國定古蹟。而老街中有唔少攤檔，包括新鮮漁獲同小食，如果係搭船前往，都算係必經之路。

旗津景點（2）﹕旗津星空隧道

穿過「旗津老街」後，一直向西行，可以去「旗津星空隧道」方向。從「星空隧道」嘅名，好自然聯想到浪漫星河畫面，但呢條隧道其實係來自於日治時期，係一條軍事戰備隧道，同浪漫係毫無關係。只不過，於2005年先重新修建，唔單止增設木棧道，亦加上天花牆壁裝飾，當中包含夜光彩繪、漂浮木等素材，螢造星空下嘅絢爛感覺。

旗津景點（3）﹕旗後砲台

「旗後炮台」同「高雄燈塔」座落於旗津一隅，燈塔係旗津島最北面位置，而炮台就係另一端。炮台以中式營區建築為主，內有八字牆、八字門，無論階梯定牆壁，都係比較傳統設計，門口更有「威震天南」橫額﹐門牆亦有「囍」字。燈塔就以巴洛克風格建造﹐呈八角形，係一座全台唯一八角磚造燈塔。而燈塔同炮台一樣，都可以無死角環瞰高雄港海灣風景！

旗津景點（4）﹕旗津海水浴場

而「旗津海水浴場」其實即係「旗津沙灘」，每逢4月至10月都特別多人朝聖。沙灘設備齊全，有足夠沖洗及救生設備，可以放心玩水，兩個人更可以於海岸線旁漫步其中！據了解，「旗津海水浴場」嘅沙灘棧道於傍晚時份會有藍色燈光，有機會睇到「藍眼淚」嘅景象。

旗津景點（5）﹕旗津彩虹教堂

至於「旗津彩虹教堂」，就絕對係旗津島數一數二受歡迎嘅打卡裝置！所謂嘅「彩虹教堂」，其實就係一個個七色繽紛邊框順序擺放海邊，並非一個正常教堂模樣，線條簡潔俐落，由光影變化成立體空間感，現場睇反而只係幾何建築作設計元素，基本上係平平無奇。不過，已經足以令唔少人排隊打卡，成為一個極受歡迎嘅旗津IG打卡熱點！

旗津景點（6）﹕旗津海珍珠

旗津有一個「旗津海岸公園」，入面有遊客服務中心貝殼館，而依海旁走，沿途會見到一個個打卡裝置。其中，距離「旗津彩虹教堂」不遠處嘅「旗津海珍珠」，就似一個巨型貝殼，整個裝置有10米高，闊約16米，深度亦有9米，來自於當地藝術家同法國聲音藝術家打造。據悉，呢個半圓形貝殼造型製作需時6年，每當陽光照射，貝殼自然會出現金黃色。

旗津景點（7）﹕旗津風車公園

「旗津風車公園」係整條海岸線較後嘅地標，連接旗津漁港，當中有7座大型風車，顯現風力資源。公園內嘅風車呈三葉式，每當有天然風就會一直轉動，旁邊更有廣場同觀海看台。去到風車公園，不妨將單車或電動車停泊一端，坐低感受旗津漁港風景！

旗津美食

旗津毗連海岸線，四面環海，所以漁產量係特別豐富，基本上係以海產店為主，海鮮及海產眾多，亦算價廉物美，故又有人稱為旗津海產街。此外，旗津老街中都有唔少旗津小食可以選擇，比如係旗魚黑輪、炒魷魚、炸花枝、手工魚麵、魷魚、蕃薯椪、大碗公冰等。

旗津租單車體驗

去旗津遊覽時，除咗可以徒步之外，亦可以租借島內嘅單車或電動車，情侶兩個人前往就最適宜租借雙人防曬電動車，頂端有遮陽，亦可以輪流踩，較一般單車舒服。當日編輯租借嗰間叫「小麥町」（現時或結業，但老街上都有其他單車店），架電動車係甜蜜電動四輪車，可容納兩個人同時踩，由於電動行駛，所以比單車快少少。一般嚟講，租借時間係2小時，價格為TWD600，原來現場重有更短時間可以租借，無記錯當日係TWD300有1小時。不過，時間上就比較急，真係踩到旗津風車公園就要返轉頭，勉強可以踩晒7個旗津地標。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭高雄捷運橙線至「西子灣站」，徒步約5分鐘至「鼓山渡輪站」，轉搭船隻至「旗津輪渡站」，即達旗津半島範圍，落船就係碼頭，旁邊就係「旗津老街」。

❷ 旗津渡輪除咗容許行人乘搭，亦可以直接帶機車或單車上船。

❸ 旗津渡輪有2條航線，包括「鼓山-旗津」、「前鎮-中洲」，另有海上巴士「鼓山-棧貳庫-旗津」，基本上來往鼓山至旗津嘅航線係由大清早05:00至凌晏02:00，大概每5至30分鐘一班。乘搭渡輪前，必須於碼頭外排隊，而上船時要俾船票，人均TWD30，機車或單車就要多俾TWD10，皆可以用悠遊卡付款。

❹