【高雄火鍋】太和殿台北一位難求？高雄更易搵位！歎麻辣鴛鴦火鍋神級鴨血豆腐

台北「太和殿麻辣火鍋」向來受到在地人同遊客歡迎，舊時連香港影星都特別前往打邊爐，亦係情侶拍拖兩個人烚吓烚吓嘅好地方。不過，台北店人流不少，真係一位難求；E.A.Two之前就前往高雄店，發覺來自台北總店嘅高雄店唔單止係直營店，容易入場，而且交通更方便，出站即達！

「太和殿麻辣火鍋」於台灣僅有2間分店，分別喺北部同南部，其火鍋界地位崇高，超過20年依然屹立不搖！台北店位置靠近「台北101」同「臨江街夜市」，走出捷運站之後都要徒步3至5分鐘方才抵達，皆因佢係座落「信義安和站」同「台北101站」之間，兩頭唔到岸。而高雄店就位於捷運站旁邊，甫踏出捷運站，向前行1分鐘就會到達！

當然，「太和殿麻辣火鍋」於繁忙時間必然比較多人，但高雄店絕對係有希望嘅火鍋店，相對台北店大排長龍、一位難求、絕望嘅情況，真係見到曙光。如果於9點後先前往，人流更少，店內更清靜舒服。室內散發麻辣火鍋香味，裝潢古色古香，更有古色裝飾，滲出少少氣派感，感覺係走精緻同高檔路線。該店部份座位有簾、屏風分隔開，似窗花設計，有私隱度。

「太和殿麻辣火鍋」基本上係以人頭收費，並唔係以唔同湯底收費，當日一個鍋底每人付TWD120。湯底分別有「紅湯」麻辣鍋、「白湯」豚骨鍋，以及「紅白湯」鴛鴦鍋，辛辣度可以選擇小辣、中辣、大辣。湯底唔單止可調整辣度，亦可調整鹹度，有要求可以告知店員。

麻辣湯底陣陣紅油香非常吸引，花椒、指天椒等味道濃郁，卻又唔會太辣，呷入口甚至有藥材味滲出嚟，層次豐富。而豚骨湯底就係豬肉、洋蔥、蔬菜等食材，重有少少薑味，湯頭帶乳白色，入口溫潤，相對於麻辣湯係比較清純。

超鍾意食鴨血嘅編輯表示，非常鍾情台式麻辣火鍋，因為好多都同「太和殿麻辣火鍋」一樣，鍋底鴨血、豆腐都係無限量任食！當我哋還未來得及叫加鴨血，店員就已經自動自覺走埋嚟幫手加鴨血、豆腐，甚至幾次行過嚟問要唔要加邊款。

鴨血、豆腐係隨便任加之餘，水準亦高，當然後來於台北西門町食過另一間全台更高水準嘅鴨血啦！不過，「太和殿麻辣火鍋」嘅鴨血、豆腐水準都係平均地高，鴨血軟嫩，而又能吸飽湯汁；蜂巢狀嘅豆腐特別能吸附湯汁，滷得入味，鴨血、豆腐唔會只有其中一款好食。

至於食材，當日揀咗雪花肥牛TWD380、花枝蝦漿TWD180、鯛魚片TWD120、大白菜TWD70、老油條TWD40、牛肚TWD180。另外，有種手工排骨酥TWD180幾吸引，但當時就未有點餐，而啤酒一支賣TWD100、汽水一支賣TWD30，總數兩個人食用連加一大概係TWD1300，折合港幣約HKD325，人均僅約HKD160，CP值高！

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 前往高雄店只需乘搭捷運橙線至「文化中心站」，於2號出口出站徒步1分鐘即達。台北店乘搭捷運至「信義安和站」，徒步約3分鐘即達。

❷ 高雄店附近有停車場，使用隔離Times自通收費停車場停車，店家會退還TWD50停車費。

❸ 該店可以預早訂檯，座位只會保留約10分鐘。

❹ 假日用餐時間限時僅2小時。每檯低消TWD800，有加一服務費。