【花蓮住宿】近花蓮火車站！趣旅行民宿獨立包棟樓高3層、僅6間客房、設迷你公共空間

花蓮向來風光明媚，近月香港廉航又設花蓮直航，拍拖兩個人去花蓮旅行就更方便，未必需要再從台北轉車至花蓮啦！雖然花蓮機場同花蓮火車站有少許距離，但如果想要搵花蓮住宿地方，始終都係靠近火車站或市中心最方便行程。今次E.A.Two就入住一間近年開幕嘅花蓮民宿，縱然獨立包棟、樓高3層，卻只有6間房，每間房有唔同主題設計，滲出異國風情。

由花蓮火車站前往「J.T.World 趣旅行」，距離不足10分鐘步程，係一間比較交通方便嘅火車站附近民宿。該民宿於2017年開幕，走約15分鐘亦可前往花蓮市中心一帶，但若前往東大門夜市就比較遠，需要走30分鐘。

民宿為獨棟設計，樓高3層，所佔空間唔多，地下為櫃檯，旁邊有個迷你公共空間。房間要用鑰匙進入，而非飯店嗰種拍卡模式，而且只有一條鑰匙，所以更需要好好保管。而樓上3層樓都係房間，只有樓梯，並無電梯，而樓梯設計唔太方便拎行李箱，所以比較適合backpacker，即背包客。

每一層只有2間房間，而每間房間都有唔同風格，包含有歐式古典西班牙風、希臘蔚藍地中海風、摩洛哥異國風、復古工業風、樂高親子風等。房間皆為雙人房、四人房設計，由於今次入住雙人房，所以只睇到其中一間雙人房實況。房間為希臘地中海風格，佈置用心，地方亦不少，空間充足，雙人床佔房間一半都無，其餘都係活動空間。一邊有床頭櫃，包括小型雪櫃同兩支水等，另一邊有梳妝檯同掛牆電視，不過旁邊嘅掛鐘就係壞嘅，長期停留喺灰姑娘嘅時間。

浴室大小適中，同一般飯店一樣乾濕分離，沖涼時無滲水出外面，民宿亦同飯店一樣有提供各類盥洗用品，唔需要自行到外面便利店或超市購買。至於地下公共空間就有少量檯櫈，亦有雪櫃、洗手盆、微波爐、消毒鍋等提供，可以喺度進食，但地方淺窄，空間有限，只係全幢樓嘅人唔多，所以使用嘅人數都係比較少。

民宿附近有個Minsu停車場，自駕嘅話可以免費使用。呢間民宿雖然無早餐提供，但民宿職員有建議附近幾間早餐店可以選擇，包括華廈美而美、紅茶洋行、美日早餐店等。

當時於Agoda預訂房間，一晚價錢為TWD1,517，折合港幣價錢則約為HKD396，似乎同部份花蓮飯店價格相近。通常民宿、旅館等價錢都係比飯店平，但今次竟然差唔多，所以只係預訂一晚，因為佢真係好近花蓮火車站，純粹有交通方便呢個優勢。

即睇【J.T. World 趣旅行民宿】住宿價錢及限時優惠﹕Agoda｜ Booking.com｜Trip.com｜官網預訂

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 入住時間為15:00至21:00，退房時間則為11:00，預訂最好事前聯絡民宿確認，如果會遲到謹記同民宿事前講聲，因為過咗21:00就無職員喺度，亦無法進入。

❷ 民宿距離花蓮火車站僅有約6分鐘步程。

❸ 留意室內禁止吸煙，而進入民宿後需要換上民宿提供嘅拖鞋，自己嘅鞋可以擺地下專屬鞋櫃。

❹ 民宿設有免費wifi，大門口用密碼鎖進入，夜晚無職員喺度。

EATWO

Miss A

隱身中央圖書館背後！Dream浪漫西餐廳「世一」焦糖燉蛋／風乾黃油雞／紅菜頭刈包

兩個人旅吓行

專題

E.A.Tips :

J.T.World 趣旅行民宿／Hualien JT.World Homestay B&B