【花蓮景點】帳幕風山度空間依山望海！近月突宣佈休園？海上盪韆鞦、天堂之門、旋轉樓梯一度成網紅景點

座落東海岸嘅花蓮有唔少適合拍拖兩個人前往嘅網美熱門景點，但一場大地震摧毀唔少靚景地，包括以下呢個依山傍海帳幕風山度空間。近月竟然突發宣佈休園，至於幾時重開就未知，E.A.Two今年初曾到訪該店，由地面徒步上山區，有多個裝置藝術，山頂處亦可以俯瞰無敵海景！

近月知名花蓮網紅景點「山度空間」由開園至今有約5年，近月突發於官方平台發出「暫別公告」，表示10月起暫停營業，需要休園重新規畫，唔少台灣網民都大呼可惜，只能默默等待重開之日。

「山度空間」位於花蓮東海岸壽豐鄉一帶，靠近太平洋畔，依山而建，距離花蓮市中心大概有20分鐘車程時間。園主用心設計多個打卡位，山頂處裝置藝術眾多，一隅更有一個恍如水晶球嘅全透明韆鞦，背景為大海，園區更提供專人拍攝「天空之鏡」服務！

該店並非只有打卡位，近入口處有個小食亭，亦有「Hi~花蓮！」招牌，點餐區有少量飲品及小食售賣，比如係山度雞柳條TWD100、山度香檸雞翅TWD160、綜合炸物拼盤TWD280，一杯山度紅茶TWD50、而一杯茉香綠茶TWD60，基本上只係簡單小吃，無乜太大特別。

台灣嘅人氣打卡位顯然非常用心，唔會好似香港咁隨意。馬路口擺放有三角形狀logo，設計恍如帳幕，難免令人聯想到露營風格。從地面上行，皆為小山坡路段，當中有小石級，而該店於山坡上舖有布料，側邊亦設護欄，感覺係為客人安全而設。

上行至山頂中途亦設有多個藝術裝置，包括許願亭、鋼片琴等。登上山頂處，映入眼簾嘅係一個賞景位，以及一個旋轉透明韆鞦，海岸線一望無際！夢幻透明韆鞦架配搭背後海景，有如海上盪韆鞦，根本就係IG打卡位。

繼續向內走，會發現當中有更多藝術裝置，包括一個又一個帳幕式座位，於地面購買餐點後，可以上嚟慢慢食，背靠青翠山巒，正對湛藍海洋，環境舒適。

打卡裝置中，唔單止有一座天堂之門，純白色大門媲美剛才嘅天空之鏡韆鞦架。另一邊廂，重有一座潔白旋轉樓梯，登上樓梯頂，更可以從最高點俯瞰花蓮東海岸風景！

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 山度空間平時會於雨天休園，但今年10月突然輕佈休園。

❷ 花蓮山度空間入場費人均TWD80，但TWD50可以作餐飲消費，而6歲以下、身心障礙者則可以免費入園。

❸ 山度空間並無設有停車場，所以自駕只可以將車輛停泊於門口街邊，所有白線內都可以停車，不過門口外面位置唔多。如果乘搭花蓮客運，可以搭1140、1140A嘅花蓮-靜浦路線，或者1145嘅花蓮-成功路線，於海洋公園大坑站落車，徒步3分鐘即達。

❹ 店內原先有專人拍攝屋頂天空之鏡，拍照時間為10:00－12:00、13:30－17:00，每張收費TWD50。