高水準泰式Fine Dining隱身曼谷湯普森博物館！3道菜連甜品人均僅約$XX！

好多人去曼谷都會食自助餐，價格通常比香港低廉，但今次E.A.Two帶大家前往一間隱身於博物館內嘅泰式Fine Dining餐廳，價錢同自助餐無異，但水準頗高，比傳統Buffet更適合拍拖兩個人撐檯腳，即睇實試經驗、菜式、地點同兩個人入場費！

隱身於「湯普森博物館」內嘅「Jim Thompson Thai Restaurant」，係一間非一般泰式餐館，而係美感十足嘅Fine Dining版嘅泰國菜餐廳！每一道菜都係非常用心，賣相極精緻，難得係味道都唔輸蝕於其他泰國菜餐廳。店內大部份客人都係西方遊客，同到博物館參觀嘅遊客一樣，華人幾罕見。而店員服務亦一流，就好似走入一間高級西餐廳一樣，店方同客人都係用流利英文溝通，第一個印象就係食環境、食氣氛，適合拍拖紀念日前往！

好多西方客人都係以walk in形式進入餐廳，而我哋就係預先於klook預訂座位同套餐，所以座位已留座，可以坐喺圓形梳化卡位內。事實上，旅客可以事前於klook或kkday預訂座位，兩邊價錢差唔多，分別只係HKD589同HKD590，其實兩邊預訂都得。不過兩邊預訂時間上唔一樣，呢一點就要睇自己想要咩時間用餐，由於我哋比較鍾意日光時間參觀博物館，所以選擇中午時段用餐，其實Fine Dining更適合嘅係晚餐時段用餐。溫馨提示，klook午餐同晚餐各有4個時段，分別係12:00至15:00、18:00至21:00；而kkday就只有18:00至21:00，但中間幾乎每15至30分鐘就有一個時段可以選擇。

預訂時，可以選擇2人、3人或4人份量嘅餐單，當時我哋已經預訂兩個人一份3道菜嘅套餐，再加1款甜品每人各附有1杯飲品。3組人數到時都可以於餐牌上自由選擇想食嘅菜式，2人嘅係套餐A、3人嘅係套餐B、4人就係套餐C，可以於入面group A、B、C組別中再挑選合適數量嘅菜式。比如兩個人就係1+2+1+2杯飲品，三個人就係1+4+2+3杯飲品，四個人則為2+5+3+4杯飲品。雖然話預訂咗已Prepaid，但其實現場睇餐牌時，發覺每款菜式價格唔低，普通前菜都350泰銖起跳，最貴1600至2400泰銖一碟都有。經klook、kkday網上預訂套餐真係平好多，兩個人最平只係HKD598，人均HKD300有找！大概同klook、kkday合作係做宣傳啩，估計之後有機會變返正常價。

既然來自於「湯普森博物館」，該泰國菜餐廳嘅菜式都係同博物館有微妙關係，比如Jim Thompson喜愛嘅豬蹄等。而餐廳由屢獲殊榮嘅行政主廚Pepe Dasi主理，菜式唔單止融合經典泰國菜，亦包含創意，風格大膽，賣相與味道兼備，不失泰國特色，係非常精緻嘅泰國料理。

首先上檯嘅係餐飲，除咗基本嘅咖啡或茶，甚至果汁、汽水、酒精，亦有幾款比較特別嘅Mocktails。飲品名都幾吸引，當中有The Royal Project Garden、Bangkok is on Fire! My God, its hot!、Cool me down!、Mango sticky rice、Do you Fancy a Thai Tea，雖然好似有啲模糊，但其實名稱都透視咗少少，比如係類似芒果椰汁、泰式奶茶嘅飲品。今次挑選The Royal Project Garden、Bangkok is on Fire! My God, its hot!，每杯原價各180泰銖，如果預訂套餐想要再抵啲，可以點Mango sticky rice、Do you Fancy a Thai Tea，每杯原價280泰銖就貴啲。The Royal Project Garden係一杯莓果嘅飲品，包含有藍莓、石榴糖漿、紅桑子、野莓、青檸等；而Bangkok is on Fire! My God, its hot!就係包含香茅、斑蘭、青檸、泰國紅糖、梳打水，換言之就係香茅斑蘭梳打。

Group A選擇咗Nua Steak Thai，原價2400泰銖，係炭火和牛扒，來自於腰脊部份，和牛以炭火烤製後，味道得別香濃，加入香料咖喱、濃縮肉汁，再加上蕃薯同白菜仔伴碟，可以解除和牛本身嘅油膩感。不過，我哋覺得上面嘅醬汁反而有少少多餘，令和牛偏鹹，如果撥開少少醬汁，和牛味道反而恰到好處。

Group B選擇咗Lohn Pu Nim，原價550泰銖，簡單嚟講就係一碟酥炸軟殼蟹，配搭泰式椰子辣椒沾醬，再以香草點綴。軟殼蟹上檯時堆疊頗高，霸氣十足，打卡必備！軟殼蟹炸得卜卜脆，表皮炸漿唔會太厚，唔會令蟹肉太油膩，而蟹肉亦唔會好少，依然可以食到有肉感，同埋真係有一隻蟹。

Group B同時選擇咗Pad Thai Goong，原價780泰銖，原來呢碟菜式係來自於30年代，同泰國身份認同有關。菜式係新鮮泰國大河蝦河粉，以河粉配搭椰糖等泰國食材。一邊河粉炒得均勻，質感有嚼勁，配料充足，鹹中有甜，而另一邊就有大大隻河蝦，大蝦經過炭烤，所以幾香口，而蝦肉亦新鮮爽口彈牙，入口鮮甜。

至於Group C就係甜品類別，今次先選擇咗必食嘅Kao Niaw Mamuang，原價360泰銖，係一款經典泰式芒果糯米飯，不過就係Jim Thompson restaurant style限定！另外，由於餐廳方面要我哋改期，所以對方為表歉意，送多咗一款甜品畀我哋，我哋選擇咗另一款招牌，Ka Fae Thai Cake Roll，原價320泰銖，呢款甜品係咖啡卷蛋，亦係另一款Jim Thompson’s招牌作。

餐廳嘅限定芒果糯米飯非常獨特，擺盤就好似法國餐一樣，果然係泰式Fine Dining作品。芒果切成一片片，糯米飯擺放一旁，有椰汁、花生、焦糖片點綴，芒果肉香甜飽滿，糯米飯亦煙韌，甜品迷必試。今次食嘅芒果糯米飯唔需要外賣，相當新鮮。至於咖啡卷蛋亦有驚喜，卷蛋上檯時以膠片包裹週圍，只要向上拉開膠片，咖啡漿就會好似瀑布一樣順流而下，流向咖啡蛋糕，好似火山爆發一樣，蛋糕亦好有咖啡香，適合咖啡迷。

klook預訂網址

kkday預訂網址

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 如果只進入餐廳，其實無需要購買門票入場，但建議同日參觀埋博物館，值得遊覽。lunch time時間為11:30-15:30，但事前預訂可以揀埋用餐時間，最好預2小時用餐。

❷ 湯普生博物館入場費為200泰銖，而餐廳以二人計算，套餐入場費約為港幣600蚊，人均大概就係300蚊。

❸ 該餐廳可以事前於klook預訂，會較方便旅客，必須趁早同官方confirm，對方亦會於whatsapp同客人聯絡，因為預訂咗都隨時會因某啲包場活動而要改期。
klook預訂網址﹕https://www.klook.com/zh-HK/activity/110107-jimthompson-thai-restaurant/
kkday預訂網址﹕ https://www.kkday.com/zh-hk/product/157743-bangkok-jim-thompson-a-thai-restaurant-thailand。

❹ 餐廳風格就好似fine dining一樣，所以最好要注意自己入場衣著，唔好太Casual。