台北私心推薦最高水準手搖茶飲！約翰紅茶公司隱身江南街飲料店！英式風格茶底香濃、啖啖絲滑如綿！

台北手搖茶選擇眾多，幾乎梗有一間喺左近，你拍拖兩個人前往台北又飲過幾多間呢？台北好多手搖飲品都有一定水準，但講到台北最難忘嘅手搖茶，E.A.Two首選絕對係以下呢間英式紅茶店，入口絕對可以用絲滑嚟形容！

「約翰紅茶公司」以深寶藍色招牌設計，充滿英倫文藝特質。每一間裏裏外外都加插英式風格，感覺高貴典雅，就似售賣英式下午茶飲用嘅紅茶。該店於台中僅有一間分店，而台北亦只有五間分店，分別靠近捷運「市政府站」、「港墘站」、「南勢角站」、「石牌站」、「南港展覽館站」。雖然係距離捷運站不遠，交通算係便利，但每間都並非座落遊客區，呢啲捷運站都係比較少旅客會前往。

今次E.A.Two前往內湖區，方才發現呢間隱身於江南街嘅手搖飲料店。原來內湖區江南街都算係一道滿佈手搖茶飲店嘅小街，比如有「再睡5分鐘」、「一沐日」、「老賴茶棧」、「藍室」、「可不可熟成紅茶」、「珍煮丹」、「Mateas鮮奶茶沙龍」、「不想上班只好喝拿鐵」、「茶湯會」、「五桐號」，以及「約翰紅茶公司」。數量上比台北永吉路已經算少，但同一條街內都算多，只係唔係太集中同一個範圍，江南街中段會有比較多間，恍如一個手搖飲料戰場。

內湖區「約翰紅茶公司」正正座落於江南街中段，該店係第一間開設嘅店舖，即係內湖區最早期發跡嘅地方。其後，先至由內湖區江南街發展到其他地區，據悉順序係內湖、南港、信義、台中等。不過去到現場，該店基本上係無人排隊，完全唔覺得係一間受歡迎嘅手搖茶飲店。

店內每杯手搖茶多數分中杯、大杯，少部份有熱飲可以選擇。紅茶同奶茶各有4款，紅茶有曼非紅茶、茶中香檳、錫金紅茶、灼香紅茶，奶茶就有雨果那堤、曼非那堤、煮濃那堤、烏瓦那堤。紅茶有指係來自印度，而奶茶係配搭六甲鮮奶，據知煮濃那堤嘅奶茶甚至可以令一隻湯匙豎起。另外，重有生乳紅茶，以及紅茶調製特飲，例如玉釀紅茶、伯爵可爾必思等。雖則係高貴典雅得格，但最貴一杯都只係TWD65。今次只係挑選一杯曼非紅茶，價格為TWD35至40，純紅茶既可以解渴，更可以睇得到一間手搖茶飲料店嘅真實水準。

台北手搖茶不勝枚舉，但「約翰紅茶公司」真係台北手搖茶嘅黑馬！該店嘅紅茶非常獨特，係類似英倫紅茶風格為主嘅手搖茶，茶底煮得非常香濃，單睇茶葉應該唔簡單，恍如達到黃金比例，幸福感滿滿。曼非紅茶入口幾清爽順口，質感醇厚細膩，有少少果香，嗒落有回甘味，紅茶餘韻頗強。最難得嘅地方，係紅茶入口極滑溜，直頭可以用絲滑嚟形容，簡直絲滑如棉！紅茶選擇去冰無糖會更好，因為整杯紅茶都係零雜質，啜入喉嚨時，滑得令人難以置信，超有質感。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 該店接受line pay或現金付款。

❷ 乘搭捷運動物園至南港展覽館線，即啡色線，向南港展覽館方向前往，至「港墘站」落車，徒步約8分鐘即達。

❸ 該店於台中有1間分店，而台北就有5間分店，多數位置都係遠離遊客區。台北分店位置分別近「市政府站」、「港墘站」、「南勢角站」、「石牌站」、「南港展覽館站」。

❹ 簡單嚟講，店內只係得紅茶、奶茶可以選擇，只係有唔同口味。