【高雄景點】車站直達橋頭糖廠藝術村！百年製糖工廠搖身變博物館！草皮上隱身復古鐵園迷城！

高雄係距離香港好近嘅地方，搭飛機只係需要1小時，隨時比香港市區去大西北更快！高雄景點不少，好多人都會集中前往「夢時代」、「旗津島」、「高雄港」、「瑞豐夜市」一帶，今次E.A.Two就依捷運紅線走，前往比較高雄較北面嘅車站，甫出站就可以抵達一個藝術村，入面重有一個來自於製糖工廠嘅博物館，旁邊草皮上更有一個復古味濃厚嘅鐵園迷城，唔單止可以認識歷史，亦都係打卡必到！

甫踏出「橋頭糖廠站」就會抵達「橋頭糖廠藝術村」，部份在地人會叫做「橋仔頭糖廠藝術村」。事實上，呢個位置係來自於台灣第一座現代機械化製糖工廠，無論工廠定設施至今依然完好保存，並且於2002年被列為高雄市市定古蹟。該糖廠原名叫做「橋仔頭製糖所」，後來曾經易名為「橋仔頭糖廠」，最終變為糖廠園區，分為「橋頭糖廠藝術村」、「台灣糖業博物館」，並開放民眾及遊客參觀。

糖廠園區地方偌大，可以拍拖兩個人一日遊，遊客服務中心有單車可以租借，如果想節省時間，可以踩單車遊覽園區，慳返腳骨力同時間。基本上，整個園區主要景點就係「製糖工場」、「糖業博物館」、「鐵道景觀休憩區」、「鐵園迷城」、「黑銅聖觀音」、「廠長宿舍」、「雨豆樹廣場」，以及人氣好旺嘅「五分車」等，入面更有文創商店，以及「糖廍咖啡」、「台糖冰品」等，可以chill吓。

建於1901年嘅「橋頭糖廠」係台灣首個製糖工廠，屹今有超過百年歷史。該糖廠直到1997年停止製糖，曾經一度丟空，而2001年就有一堆在地藝術家搞咗個藝術家駐村計劃，將本身係日治時期「橋仔頭糖廠招待所」嘅橋仔頭白屋部份變藝術村。而呢個地方更為藝術家提供工作室同住宿地方，週邊更不時有藝術活動。製糖工廠既為歷史古蹟，將糖廠完好保留之餘，連週邊嘅日式木造宿舍、防空洞、百年樹木、紅磚水塔等都保留落嚟，週邊都係日式傳統庭園，有種侘寂感，一般遊人都可以隨意進入參觀。

抵達糖廠博物館之前，可以先抵達「鐵園迷城」同一個防空洞。當中有台灣工業現代化火車頭，一列列火車同路軌置於草皮之上，列車係運送貨物用途，現時依循舊鐵道步行，恍如穿梭時空，懷舊味濃。附近有藝術家以廢鐵組件嚟拼湊各式裝置藝術，比如係炮台、戰車，重有機械人等鐵件裝飾藝術品，更有長滿「九重葛」嘅迷宮花園，女士們打卡必到！

毗連「鐵園迷城」，就係變成「糖廠博物館」嘅舊製糖工廠重點位置，呢個位置就係一個經過活化、保存嘅工業歷史遺址。呢座糖廠係一個古蹟保存區，令大家都好容易明暸該糖廠以前就係用壓榨方式製糖。日治時期時，原來糖業曾經係台灣主要經濟支柱，只不過時代進步，糖廠先唔再製糖。

糖廠博物館唔單止資料詳盡，連舊糖廠所有設備都可以環瞰全貌，遊人可以清清楚楚睇到製糖步驟，包括運輸甘蔗到壓榨甘蔗，以至洗淨、蒸發、結晶，甚至最後分蜜、包裝，全部一覽無遺。原來當時平均每日會壓榨200噸甘蔗，經歷過台灣工業革命，現時已經成為一間觀光糖廠。

博物館週邊有唔少日式建築物，比如係40年代嘅「廠長宿舍」，採用木造瓦頂平房設計，以前係「台灣製糖株式會社」。而「社宅事務所」亦係日治時期建築物，以木系為主調，包括歐式拱門造型，設計有幾分似荷蘭嘅東南亞殖民地建築物。部份日式建築物已經改為餐廳等用途，例如係「吉照故里茶道院」等。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭高雄捷運紅線至「橋頭糖廠站」，出站即達。

❷ 經過「橋頭糖廠藝術村」、「鐵園迷城」，就會去到「台灣糖業博物館」。

❸ 「台灣糖業博物館」其實就係舊製糖工廠，入面完好保存，有步道可以徒步自由參觀。

❹ 入面有單車可以租借，可以揀單人或家庭車，唔想行可以踩單車遊覽週邊，不過家庭車嗰啲就唔太方便走入去糖廠博物館。