【台南景點】毗連台灣好行公車站！洋式燈塔來自安平古堡！觀夕平臺賞夕陽、超長海堤賞安平港！

講到台南安平一日遊，黃昏時份最後一個景點必然係觀賞夕陽勝地，今次E.A.Two走到毗連「安平燈塔」嘅「觀夕平台」。雖然當日非常黑仔，遇著天氣麻麻，比較多霧嘅日子，未能觀賞台南最美夕陽，但呢個位置都係散步吹海風嘅好地方。拍拖兩個人走過沙灘盡頭嘅超長海堤，都可以飽覽安平港靚景！

由「安平老街」、「安平樹屋」或「安平古堡」出發，徒步至「炸雞洋行」、「同記安平豆花」，腳程大概係10分鐘；再由炸雞店、豆花店起步，徒步大概20分鐘，就可以抵達從「安平古堡」轉移嘅「安平燈塔1908」。而燈塔另一端就係台南觀賞夕陽之處，官方直頭將呢個沙灘易名為「觀夕平台」，變成旅遊景點。

位於安平區西面嘅「安平燈塔」，從外觀上睇，就係一座西式燈塔，以純白色圓形磚建造。據悉，原先係來自於「安平古堡」上嘅燈塔。原先燈塔係有導航等作用，但由於後期地理位置影響，燈塔距離海岸愈來愈遠，海中未能睇到燈塔發出嘅燈光，所以該燈塔曾於60年代停止使用。不過，轉瞵於1965年就將該燈塔完整遷移，搬到現時嘅沙灘旁邊。

「安平燈塔」本身係位於紅毛城內，歷史可追塑至1872年，後來於1891年變成一座方型鐵塔，其後於1909年再改為一座白色圓形磚造燈塔。最終，由「熱蘭遮城」之稱嘅「安平古堡」搬到「熱蘭遮城」嘅北面角落。目前，呢座燈塔依然有發揮導航功用，並無荒廢。

至於毗連「安平燈塔」嘅「觀夕平台」，現時就係一個頗受歡迎嘅台南景點。所謂嘅「觀夕平台」，其實就係一個台南沙灘，但就係安平港國家歷史風景區內嘅熱門景點。入面有個三角形平台，既可以防風，亦可以觀賞湛藍海岸風景，更可以於黃昏時份欣賞台南夕陽靚景，例如係火燒雲之類嘅日落，攝影發燒友必到！

當日並無靚日落，所以E.A.Two決定四圍走走發掘一下。走到沙灘左邊盡頭方向，會發現有條小路可以通往北堤燈塔，唔少在地人都會通過。不過，要留以當中有兩條路線，一係走上堤壩上方走道，二係走下面平台大路，兩條路基本上全條直路都無交集，所以揀咗就無得走另一條路，除非走到盡頭或原路折返。

小徑路段可以直抵北堤燈塔，全程皆為平路，僅有約600米，走下路就比較安全。該路段唔單止可以欣賞放眼海景，而且可環瞰安平港風景，打卡必到！而盡頭安平港漁港北堤燈塔可以360度望安平風景同台灣海峽風景，重有安平漁港出海口，而對岸就係「漁光島」嘅安平港漁港南堤燈塔。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 台南「台灣好行」98號可以直達「觀夕平台」，該公車可以折返「台南車站」。

❷ 記得留意公車時刻表，因為98號公車最後班次只係到18:30，而「七股鹽山」開出嘅班次更加只係到18:00，謹記唔好預到太抆。

❸ 如果由「安平老街」、「安平樹屋」等景點徒步前往，其實都係30分鐘腳程，慢慢散步行過去都係可行。

❹ 如果想睇夕陽，記得事前留意天氣情況。於海邊散步吹風，都係幾舒服，一端可以走到盡頭北堤燈塔位置。