【河口湖住宿】食早餐望富士山！富士高級度假村房間超大、4人房僅$XX！免費接駁巴士來往車站／富士急！｜Fuji Premium Resort

「河口湖」一帶有唔少酒店可以選擇，如果想要Budget上比較經濟實惠嘅酒店，又想要拍拖兩個人喺酒店睇到「富士山」風景，真係唔係太容易。今次E.A.Two於「河口湖」一帶租車自駕，就前往距離「河口湖」有10分鐘車程嘅酒店，原先房間可以睇到「富士山」，但目前淨返一個地方能夠睇到「富士山」，到底點解？

今次入住嘅「河口湖」酒店係「富士高級度假村（Fuji Premium Resort）」，位置其實係近山邊，但距離「河口湖」車站只有約10分鐘車程，上行一條斜路就可以到達。自駕前往的確係最方便，但要留意技術唔係太好嘅司機就要小心，因為真係需要上行山邊斜路，揸唔到就唔好選擇呢間酒店。不過，若然駕駛技術不俗，則無咩問題。

酒店設有免費停車場供入住客人停泊車輛，但停車位其實係酒店下面少少嘅斜路入面嘅爛地，有兩三個area可以停泊。下面嘅車位會比較方便架車，最頂係難泊啲，但就較近酒店，唔使行咁耐，皆因馬路係斜路嚟。

上行酒店時，會見到左右兩邊都有大樓，左邊係counter、設施、餐廳，右邊就係房間位置，中間則為shuttle bus。呢間酒店環境比較舊式，並唔似好新開業，原來真係喺1988年已經開業，地方唔細，大概有5萬坪空間，週邊都係叢林景。而酒店房間則有100間，地下就有自動販賣機、洗衣房、手信商店。櫃檯對面有間商店，入面都有唔少「富士山」手信，亦有唔少醬汁、酒類，氣泡酒、啤酒、紅白酒到日本酒都有。

設施大樓內有唔少遊樂設施，包括泳池、桌球、乒乓球、網球、高爾夫球、兒童遊樂場、夾公仔機，不過似乎大多數都無咩人玩。設施基本上都係位於地牢，都係比較陳舊，設施都唔係太吸引。留意好多設施都唔係免費使用，需要另外付費，例如桌球係每小時2100円，飛鏢都要200円。

房間主要係雙人房、四人房，可以再加床，一間房最多可以畀5人同時入住。雖然本身打算入住雙人房，但發現四人房價格差唔多，地方就大好多，所以最後選擇咗四人房。房間入面設備齊全，有一間開放式大房，可以拉埋房門，連有大浴室；另一間細房就同一般酒店房大小差唔多，出面重有一間細啲嘅浴室。浴室入面亦設備齊全，有即棄洗盥用品，所以唔需要自備。雖然酒店無咗公共溫泉浴室，但留意房間嘅浴室可以浸浴，而且啲水都係來自於溫泉水，不妨一試私人溫泉浴！

房間內既有梳化、茶几、大餐檯，亦有廚房，亦有洗碗盆同飲酒嘅設備，例如啤酒開瓶器、紅酒開瓶器、酒杯，甚至係裝冰嘅冰桶。不過，開放式廚房無煮食工具，但唔知點解設有抽油煙機。酒店正常係唔可以煮食，只能夠食吓外賣或杯麵之類無火煮食嘅食物。

房間一端重有一個室內嘅陽台位，有落地大玻璃窗，兩張櫈係可以賞景，皆因本來係可以眺望「富士山」，但朝早就發現根本睇唔到「富士山」，窗外風景完全被高聳大樹遮蔽風景。據悉，日本砍樹唔係咁簡單，亦唔容易，係唔可以隨便砍伐樹木，難怪啲樹咁高都無人理。大概酒店方面都無諗過啲樹會生到咁高，可以估計本身房間真係可以盡享「富士山」靚景，難怪四人房都咁平！

如果想於酒店睇「富士山」風景，就一定要選擇連早餐，因為現時得餐廳位置先可以睇到「富士山」。窗邊三四張檯更可以坐喺「富士山」景旁邊享受早餐，但真係要鬥早，最好預早少少時間去，否則就無得坐窗邊位。

酒店早餐係以自助餐模式為主，係日式同西式混合，食早餐就會發現大部份客人都係來自西方，呢種酒店似乎比較吸引西方遊客。早餐菜底都有約30款，唔算太多，都夠食，包括前菜、配菜、主菜、飲品，部份係山梨縣當地新鮮食材，例如雞蛋。

即睇【富士高級度假村 (Fuji Premium Resort) 】住宿價錢及限時優惠﹕官網｜Agoda｜ Booking.com｜Trip.com｜Expedia｜ Hotel.com 預訂

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 入住時間為15:00，退房時間則為11:00。但留意櫃檯最後服務時間係22:00。

❷ 由「河口湖」車站去酒店，可以同酒店聯絡乘搭免費穿梭巴士，亦可以自駕前往，車程大概係10分鐘。而shuttle bus就喺兩幢大樓之間上落車，最好同酒店方面攞定時間表。

❸ 建議揀包早餐，因為目前主要「富士山」景都係喺餐廳大窗度。本身預訂酒店房都應該有早餐，如果無又想加早餐﹐人均為2200円。

❹ 酒店分兩幢大樓，一邊係房間，一邊係餐廳同設施，counter就喺設施同餐廳嗰邊。