【河口湖美食】印度咖哩店隱身富士山腳下！巨型特製窯烤薄餅有幾大塊？｜Ganjisugawa Fujiyoshida

前往「河口湖」觀賞「富士山」嘅同時，好多人都會拍拖兩個人去食日式餐廳，今次E.A.Two就前往同樣位於「富士山」下嘅印度咖哩餐廳。聽聞唔少日本人都鍾意食印度咖哩，而日本咖哩就正正係來自於印度咖哩，所以日本嘅印度餐廳唔單止有一定水準，而且頗受當地人歡迎。

位置距離「河口湖」站只係有約4分鐘車程，門口有停車位，所以都好方便。而當日E.A.Two於夜晚前往，所以睇唔到週邊風景，其實餐廳旁邊係可以睇到「富士山」呢！

餐廳主打就係印度料理，由印度人主理，所以印度咖哩都係頗正宗，最平係有權可以人均1000左右埋單。事實上，餐廳係一間以印度同尼泊爾料理為主，咖哩就包含有36種香料，當中炮製咗20種咖哩，鍾意食咖哩真係要試一試。

如果中午去價錢上係比較低，因為Lunch Set有至少4款套餐，包括雞肉咖哩、海鮮咖哩，最平950円就有，最貴都係1490円！每款套餐都係有沙律菜、一款咖哩，重有烤薄餅、一杯飲品，價錢高啲就會多咗啲小食。

而夜晚Dinner Set套餐都至少有5款，小童餐最平850円，女士套餐1290円，芝士薄餅套餐1620円，單人套餐1690円，烤飯套餐1790円，印度烤雞套餐1890円，特別套餐2230円，Service Set一份3180円，雙人套餐就賣4590円。今次E.A.Two揀咗雙人套餐，足夠兩個人享用，包含有2杯飲品、2份沙律菜同餐湯，1份印度烤雞，2份特製窯烤薄餅或飯，2份咖哩汁，最後2杯雪糕，而雪糕就得雲呢嗱味。

前菜只係普通沙律菜，再加兩杯飲品，啤酒一杯大概400至600円，無酒精飲品則戚250至500円，啤酒重有印度啤酒同印度威士忌，都算係比較鮮見嘅選擇。至於小食就有土耳其烤肉串、烤大蝦，重有偏紅嘅印度烤雞，表皮焦香，但質感比較嚡，烤蝦就唔錯，但烤肉同烤雞就一般般，烤得比較乾身，缺少咗平時鍾意嘅肉汁。

最驚喜係印度烤餅，而烤餅都可以揀13款口味，一款係原味，一款係加入芝士，所以一定要揀烤餅！而印度烤餅每一塊都係大過塊臉，比Miss A同Mr E嘅高度更加長，真係巨大印度烤餅！每塊烤餅都係用料十足，有麵粉香同烤餅香，上面重有啲芝麻香。烤餅唔係紙咁薄，反而係有質感同厚度，撕落去入面係好似麵包咁，質感係軟腍，而非烤得好乾身，同埋烤得好香酥可口。

每個類別都有超過10款可以選擇，比如係咖哩汁，今次揀咗有蝦嘅海鮮咖哩，以及雞肉咖哩，兩者入面都有海鮮同雞肉。咖哩汁可以自由選擇辛辣度，當中有10個程度，包括0級係偏甜，第2級係正常，3至4級就係少辣，去到5至6就係正常辣，第10級就係最辣，原來正常辣都係等於唔辣，所以我哋覺得可以點3級以上嘅辣度，但無咩需要就唔好搏太辣嘅級數，除非想自我挑戰！而海鮮咖哩係比較似印式咖哩，而雞肉咖哩就係偏甜同多奶油味，唔知係咪因為一個係3至4級，一個係2級。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 由「河口湖」車站前往餐廳，大概4分鐘車程就會到達，徒步過去就需要24分鐘左右。

❷ 餐廳旁邊可以見到「富士山」，夜晚就少人啲。午餐時間為11:00-15:00，晚餐時間則為17:00-22:00。

❸ 門口其實有停車位，但當日夜晚唔敢搏，所以泊咗喺「Kawaguchiko Shopping Center BELL」外面嘅停車場，都係免費停泊，商場位置其實同樣有得睇「富士山」景象。

❹ 接受現金、VISA、Master、JCB、AMEX、PayPay、au PAY付款。而呢度可以包場，所以未必一定可以即時walk in。