【河口湖溫泉】富士山下Fujiyama溫泉入浴費人均$XX！富士吉田市日歸溫泉天然水助美肌＋促進血液循環！

去日本旅行，唔少得要去大浴場浸溫泉，而「河口湖」一帶就有間頗受歡迎嘅溫泉浴場，毗連「富士急樂園」，人氣極高！浴場人均最平只係620円，最貴時段都係1700円，可以於關門前無限時逗留，拍拖兩個人必去！

呢個好受歡迎嘅溫泉浴場係「富士山溫泉（ふじやま温泉）」，距離「河口湖」車站僅有約5分鐘車程，交通方便！呢個浴場係日式大眾溫泉，座落知名景點「富士急樂園」旁邊，溫泉浴場附近更有Donki超市，而門口對面亦有個停車場。

入場需要先將對鞋擺低喺門口locker，然後拎住鎖匙到櫃檯做record，唔需要畀錢住，因為最後係喺自助機自行付款。條鎖匙係可以用嚟買嘢同畀錢，例如餐廳、手信店，甚至販賣機。

溫泉水由38度、40度、42度，到最高44度，分別有幾種湯可以選擇，記憶中有寢湯、jet bath、vanadium bath、凍風呂、炭酸水、露天風呂，其中戶外露天風呂體感上係最高溫，好似火山溫泉。

溫泉水嘅水源係來自於「富士山」獨特天然水，叫「含釩水」，另有高濃度碳酸泉，可以促進血液循環；美肌之湯更含有可促進新陳代謝嘅矽酸鹽，令皮膚更光滑細緻。而好高溫嘅露天浴池就係日式風格，甚至入面基本上都係木造浴室，更以火山石砌成溫泉池。另外重有桑拿室，據悉係以「富士山」熔岩同天然水打造。

1樓係大堂同大浴場，2樓係餐廳，3樓係休憩處，4樓係岩盤浴，浸完溫泉可以去坐低休息吓，或者醫吓肚，甚至使用按摩設施，全部一條龍服務。如果係日光時間前往，更加可以於3樓同4樓係可以睇到「富士山」景象！

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 朝早同夜晚最遲入館時間為08:30、22:00。浴場係全年無休，但有可能有幾日係做維護保養。餐廳營業時間就係11:30－22:30。

❷ 朝早人均800円，小學生以下就係400円，其他時間人均就係1600円，小學生以下就係800円。而週末日人均係2000円，小學生以下1000円。另加館內衣服就加300円、岩盤浴680円。

❸ 溫泉浴場好近「富士急樂園」，距離「河口湖」車站亦只係得5分鐘車程。浴場係有停車場可以免費使用。

❹ 浴場入面有浴巾提供。有牛奶販賣機，一支200円，有3款口味。而餐廳一碗麵就大概1000円。