大圍轉場荃灣？ADO洋食屋招牌半熟滑蛋蛋包飯人氣極高！到底邊樣嘢大扣分？

近年，好多人成日話飲食業低迷，餐廳無咩客人，好難做到落去，但若然有吸引力依然有好多人慕名而至。有一間以人氣日式蛋包飯店，由大圍轉場到荃灣，整體其實不過不失，拍拖兩個人可以一試。不過，E.A.Two覺得有一樣嘢真係絕對要大扣分，到底係咩呢？

原店位於大圍嘅「ADO洋食屋」，目前已經轉址至荃灣區，於2022年先開業，裝潢亮麗，似一間舊式風格嘅西餐廳，加入昭和時代風格。室內亦有懷舊吊燈裝飾，不過座位都係比較狹窄，始終走唔甩港式茶餐廳風格嘅座位。

而小店嘅菜式就係一間日式混合西式為主嘅和洋風格，即係日式西餐，招牌之作就係流心半熟滑蛋嘅蛋包飯。蛋包飯有唔同醬汁口味可以選擇，吸引唔少人前往打卡兼品嚐。每人點一份主食之後，可以升級套餐加$27，有餐湯、前菜、飲品，咖啡或茶，凍飲加$3。餐湯係忌廉粟米湯，但始終都係罐頭湯炮製而成，味道明顯，上面只係加咗麵包粒。而驚喜嘅反而係一小碟前菜，涼拌蓮藕片好開胃，正好為比較膩嘅和洋式主菜打個底。

一碟Ado’s自家手打日式漢堡排$110，其他菜式有紅油燉牛肋條$88、奶油味噌野菜燉雞腿肉$84等，價錢上嚟講有少少貴，漢堡排會另外配上白飯，而唔係擺埋一碟，同以前啲餐廳無異。漢堡排入口係好軟腍，但牛味唔重，好似煎嘅時候散咗啲走，唔係juicy感，質感好似唔係好黏，有少少散。牛肉入面好似唔只牛肉，唔知係咪混有其他肉類，有少少洋蔥同香料，下面醬汁唔多，味道鹹鹹甜甜。漢堡排水準一般，不過不失，同坊間唔係太大分別，總之唔差，但爭少少。

講到人氣之述必然係蛋包飯，每一檯都一定有人叫。既有經典日式牛肉醬汁蛋包飯$86，亦有明太子奶醬蛋包飯$120、濃厚奶醬蛋包飯$110、咖哩蛋包飯$86等選擇，其實價格都係偏高，全部都係得醬汁。今次揀經典日式牛肉醬汁蛋包飯，上檯有一坨雞蛋擺放飯面，飯粒已黏滿茄汁，入面包含洋蔥碎同蘑菇，底下就係日式牛肉醬汁。將雞蛋蛋皮輕輕切開，雞蛋就會由中間向下反落嚟，切得好係可以將下面嘅飯完全覆蓋！

蛋皮表面似幾實淨，但蛋皮下面嘅雞蛋係半生熟狀態，質感軟滑，所以一切就會各下流，雞蛋偏甜，有蛋味，但唔係好重。蛋包飯其實都唔係差，但又唔係可以令我哋回頭嘅菜式，都係爭少少。既然收加一服務費，其實由店員問一句使唔使幫手切開蛋皮，絕對會加分，客人就可以專心打卡。

見到餐牌嘅咖啡有店舖專屬舖名拉花，打算試一試，所以點凍咖啡解解炎熱天氣之餘，亦點咗一杯熱焦糖咖啡。不過，熱咖啡就無「ADO」店舖字樣專屬拉花，只係普通拉花圖案，係少咗個人特色同有少少失望。自己好少做咖啡拉花，唔知拉圖案定拉個字會容易啲。而家嘅咖啡比以前啲咖啡店較好，因為少咗烘焙味，咖啡味係比較原始少少。雖然係焦糖咖啡，但焦糖味其實唔多，似一杯正常熱Latte，只係有好少甜味。

最初E.A.Two提到呢間小店有一樣嘢令我哋大扣分，但呢樣嘢其實同菜式或服務都係毫無關係，因為呢一點係同入座前有關係。由於該店人氣頗高，所以任何時間都要先喺門口QR Code取票，再等待入座。不過，張QR Code喺角落頭，而且係一張唔起眼嘅白紙，幾乎睇唔到。而最嚴重嘅問題，就係QR Code入面嘅系統，感覺整個System似係一個略懂IT同寫少少code嘅人去做出嚟，想行電子化，但做出嚟就只係有嚿嘢，講user-friendly絕對係零分。講真，不如用返實體取票啦！

整個system嘅ux ui都真係幾差吓，並非喺user嘅角度出發。scan QR Code之後，會進入一個餐廳專屬頁面，的確可以即時留名同電話號碼預訂座位，然後會出現客人取得嘅號碼。不過，就真係只係得呢個號碼，整個頁面都睇唔到前面有幾多個號碼，換言之取票後係唔知道前面有幾多張檯需要等候。頁面只有英文可以選擇，無其他語言。同時，可以預先睇到下面有餐牌，可以預先睇到該店嘅菜式選擇，同門口實體嗰份一樣。

E.A.Two直接拉門入去問職員，方才知道目前去到幾多號，需要等幾多張檯，但畫面係並無顯示出嚟。後來於畫面撳出撳入，只係見到booking頁面同餐廳資料，上一頁又下一頁，然後唔知撳咗咩先出到一頁係前面有幾多個號碼！當輪到自己個號碼時，系統就會有個電話打去剛才輸入嘅電話號碼。而個通知電話其實係電話錄音嚟，號碼係3字頭，同啲kk園詐騙電話無咩分別，一個唔小心就會無接聽。而電話係全英語通知嘅語音，佢意思係會請輸入返號碼確認，需要撳返1號或2號，1係確認入座，2就係取消輪候。同時，系統會話該座位只會hold 10分鐘，逾時就自動取消。

平時成日見人質疑唔識整呢樣嗰樣，但一味淨係識批評，不嬲都哋都唔會隨便批評嘅。講真E.A.Two都識整呢啲system，所以應該有條件可以去評價呢個system嘅利弊，講真整到咁，不如搵我哋幫手整過個system啦！不過平時要收錢。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 店內有加一服務費。付款方式接受現金、FPS。

❷ 留意用餐時間限時60分鐘。

❸ 必須要先於門口QR Code取票，然後留意佢專屬頁面﹐有位會有電話打畀客人，但係英文電話錄音嚟，最後撳1字或2字，1字係會去，2字係放棄座位。

❹ 要睇淨返幾多個位，要上一頁下一頁咁撳嚟撳去，先睇到前面幾號number，但都係睇唔到前面要有幾多個，佢入面部ipad都要搵先見到有幾多張檯要等。