大埔廣場3間地舖一次歎日式料理/車仔麵/海南雞飯 帶你海濱公園野餐隨行

大埔美食點有好多,今次縮窄範圍,集中講吓大埔廣場,整個廣場內其實只有3間食店,包括有日式料理、港式車仔麵及泰式海南雞飯,而拍拖兩個人由大埔廣場前行至海濱公園野餐,腳程只係約5分鐘,非常方便。

大埔海濱公園係大埔區內最適合野餐嘅地方,係全港面積最大嘅公園,除咗偌大草地,亦有枱櫈可擇,能夠舒舒服服野餐,部份位置可見海濱長廊,更可享吐露港景緻。

(1)八鯨料理

八鯨料理係大埔廣場內有一間日式料理店,以為係居酒屋之類嘅餐廳,但一望價錢,原來只係一間街坊料理店,貌似港式屋邨商場內嘅日本餐廳,最出名係鰻魚飯或丼飯,每份套餐$100有找,最平$60幾蚊就有。

價格較相宜嘅係雜錦魚生丼配麵豉湯$64,內有三文魚、吞拿魚、玉子,俾多$20 嘅特上魚生丼配麵豉湯$84 就有更多魚生,包含玉子、甜蝦、海膽、三文魚、八爪魚、鱆紅魚、蟹棒、帶子。小店魚生並無將貨就價,反而出品質素唔錯,飯粒為珍珠米,麵豉湯內含白蘿蔔、紅蘿蔔、海帶等。

多款套餐都包含三文魚,肉質肥美鮮嫩,魚生都算厚切,海膽無腥味而甘甜,狀似馬糞海膽,而有頭甜蝦、鱆紅魚夠鮮甜,帶子亦厚身,連玉子都唔錯,有蛋香,基本魚生食材夠新鮮。

(2)多多車仔麵

毗連八鯨料理嘅係多多車仔麵,雖然寫明以車仔麵為主打,但原來最高質同最受歡迎嘅並唔係車仔麵,反而係炸豬扒,同埋自家製辣椒油。當中自家製辣椒油每樽$25,包含芝麻、花椒油,超級香口,辣度有層次,花椒油出色,絕對係嗜辣者必試之選。

基本三餸車仔麵$40、四餸車仔麵$48,淨餸每款$10,但原來淨餸係極度搵笨,份量同車仔麵一兩年無乜分別,所以下次無論點都係叫車仔麵算啦!4款餸中挑選聰明哥豬扒或雞扒、大蟹棒、柱侯牛腩、豬大腸,基本上除咗豬扒,其他都無咩好提。只係湯汁配搭其辣菜脯係幾獨特,腩汁湯底鮮甜中有辛辣味,幾開胃,配搭蝦籽麵等麵底會更好,不過湯汁唔建議飲。

即使係外賣,身為生招牌之一嘅聰明哥豬扒,都能夠一直從盒中傳出陣陣香氣,食落更香口。豬扒經過醃製,炸成金黃色,鹹香味重,表皮有微微脆感,肉質鬆化,軟腍而有肉感,入口唔會好肥膩。

(3)暢和號

離上述2間小店有好個舖位嘅暢和號,人流較少,舖面亦較細,只有外賣供應,主打泰式去骨海南雞飯。海南雞例牌$38,一隻$200、半隻$100,而去骨海南雞飯$48,轉雞髀飯就賣$55,套餐連例湯加$10,另加香料雞油飯需要$12,至於泰式奶茶跟餐$8、單買$15,奶茶甜度較高,為自家製作,似泰國好甜嘅泰式奶茶。

呢間海南雞飯外賣店舖位較細小,狀似小食店,餐牌都係比較簡單,選項基本只有海南雞飯,分別係有無雞髀,白飯定油飯。

海南雞份量適中,叫雞髀真係全雞髀肉,油飯份量較多,兩者之間大概係1:2,油飯香口,有雞油味,而雞肉亦嫩滑而唔嚡口,雞皮與雞肉之間有層啫喱,似乎幾有水準。至於醬汁有3款,同坊間食到嘅並唔一樣,貌似自家調製,甜醬油非常濃稠,辣醬亦夠香辣,薑蓉則無蔥,反而變成全薑味。

E.A.Tips :

❶ 乘搭巴士路線72A,73,73X,75X,271, 275R,74K,75K,71K,71S,皆可到達大埔海濱公園或大埔廣場。

❷ 八鯨料理截單時間為21:45。

❸ 3間小店都為地舖,於廣場外,所以無需要走入廣場內。



EATWO
Miss A

八鯨料理

大埔安泰路1號大埔廣場地下57號舖
11:30 - 14:45、18:00 - 22:00
2665 0997

多多車仔麵

大埔安泰路1號大埔廣場地下56號舖
11:00 - 23:00
3619 4682

暢和號

大埔安泰路1號大埔廣場地下59A號舖
星期一全日休息;星期二至日12:00 - 15:00、16:30 - 20:00
6308 0087

大埔海濱公園

新界大埔大發街
24hours
2664 2107