筲箕灣東大街冬日新增隱藏版煲仔飯茶餐廳製啖啖脆脆飯焦無燶邊！

冬天氣溫下降，最適宜係打邊爐，或者拍拖兩個人歎一煲暖笠笠嘅煲仔飯，最本地最出名嘅煲仔飯係邊度？編輯以前會回答廟街煲仔飯，但近年基本上唔會食廟街煲仔飯，唔好問點解。曾經去過部份聲稱「馳名」嘅煲仔飯小店，但結果都係理想與現實之流，可能係令人期望過大。反而，今次編輯發現筲箕灣東大街有一間隱藏版煲仔飯小店，表面做茶記生意，近月新增煲仔飯，但餐牌設計伏味極濃，一嚐之下卻發現原來製煲仔飯嗰個真係低調高手！

筲箕灣東大街向來出名美食眾多，有人稱為美食街，亦有人甚至稱之為美食木人巷，但事實上良心美食唔算多，需要好好選擇。eatwo曾經推介過好幾間位於東大街嘅食肆，今次就走到一間望落伏味甚濃嘅茶餐廳，餐牌設計睇落同好食基本上毫無關係，但原來真係臥虎藏龍。

東大街中段有一間叫「金城．漁」嘅餐廳於上年初開業，無記錯以前本來叫做「金城餐廳」，都係以茶餐廳模式為主，菜式選擇都係飯麵之類，從餐牌觀察，店名多咗個「漁」字估計係因為餐牌多咗啲「魚」類菜式，比如係龍躉肉。

店內一直比較受歡迎嘅招牌作係厚切芝士焗豬扒飯$66，由點餐起計，製作需時15分鐘，即叫即焗。每一份套餐都會附送例湯，等待時先飲碗例湯，當日有粉葛蘿蔔眉豆湯，材料都多，但多數係唔食嘅配料，湯水不過不失。

以芝士焗厚切豬扒飯，連鎖店有，坊間其他食肆都有，但店內嘅「焗豬」竟然受到歡迎？單靠外觀，的確係好吸引，表面呈橙紅色，舖上濃濃茄汁，混合微溶芝士，能輕易變成拉絲芝士。芝士同茄汁之下係飯底，平常連鎖店嘅「焗豬」都係白飯底，店內嘅飯底採用絲苗米，同時係炒飯底，雖然並非金黃色，味道一般，但有誠意而份量十足。

至於豬扒部份，廚房已細心地將豬扒切開一塊塊，但表面睇落又與原塊豬扒無異，一塊豬扒帶骨，厚身而軟嫩，並非乾柴，而且有醃製過。「焗豬」配合混有洋蔥等嘅香甜醬汁，豬扒表面略有焦香感，係幾香口。焗豬扒飯嘅醬汁絕對係靈魂，總之一定好過連鎖店咁囉。

小店於冬日時份亦有8款煲仔飯可擇，原來本身無煲仔飯，只係11月下旬新增煲仔飯系列，包括原隻臘鴨髀煲仔飯$78。選擇煲仔飯時，編輯一直認為煲仔飯應該選擇臘味等肉類，因為臘味嘅油香可以完全滲透下面飯粒內，令煲仔飯更香口。其實齋食臘肉係極鹹，但臘味煲仔飯又的確係絕配，而店內竟然有原隻臘鴨髀配煲仔飯，當然要一探究竟。

煲仔飯最值得一讚嘅係火喉十足，文火、武火運用得宜，全煲都充滿飯焦，當然編輯未知係咪因為製作頭一兩煲特別細心。煲仔飯重點係煲底見到一層金黃飯焦，今次唔只煲底見，而且煲邊都見到！底部脆脆飯焦非常香口，而煲邊都有飯焦，最難得係煲邊形成飯焦嘅飯粒竟然保持雪白，若加上點豉油點綴，更香濃可口。最意外嘅地方係，雖然煲仔飯係構成飯焦，但卻又無燶邊，飯底無變成黑色。

相對於唔少聲稱「馳名」，又或者係「人氣」嘅煲仔飯店，個個爭崩頭去排隊食嘅煲仔飯，反而愈唔明顯嘅地方先至有出色嘅作品，驚喜更大。

「兩隻嘢露吓營」是「E.A.Two 兩個人醫吓肚」的一個活動，以步行及搭車方式走勻全港41個官方露營地，記錄所有露營地資訊。

E.A.Tips :

❶ 付款方式只限現金、八達通。

❷ 店內有茶記食物，飯麵為主，近月先多咗煲仔飯。

❸ 基本上焗豬扒飯要等候15分鐘，而煲仔飯更加要等15至30分鐘。

❹ 煲仔飯上枱時，記得唔好心急揭開蓋，淋豉油時亦最好叫店員唔好揭開蓋，沿蓋邊淋上豉油，因為更多飯焦就係喺呢個時候形成，等候1至2分鐘就可以揭開蓋。