近月，漁護署41個官方營地正式重開，唔少人已經急不及待拍拖兩個人到營地露營，其中梅窩南山營地被稱為人滿為患嘅營地之一，今次編輯就從梅窩出發，帶同良心店餐點去野餐，經南山古道前往南山營地，直擊現時周末營地實況，大概30分鐘即達南山營地，到底星期一至日真實情況係如何呢？
「兩隻嘢露吓營」是「E.A.Two 兩個人醫吓肚」的一個活動，以步行及搭車方式走勻全港41個官方露營地，記錄所有露營地資訊。
從梅窩碼頭出發，先到碼頭旁邊嘅良心店「Caffe Paradiso」買少少餐點去野餐，小店以外國客人為主，老闆亦為居港外國人，曾接受BBC訪問。小店多為戶外座位，室內只有一至兩個座位，戶外座位正對海旁，可以享受海邊Cafe嘅感覺。餐點當中，有Hot Breakfast Bread Rolls、Italian Panini，前者係蘇格蘭白軟包，後者則為意式香脆夾包，雖然小店現時交由本地年輕店員製作，但依舊保持水準。
折返梅窩碼頭，向迴旋處方向走至嶼南道，迴旋處左邊係通往鳳凰徑南山，整道嶼南道即鳳凰徑第一段，全程係走瀝青路，即係馬路。而迴旋處右邊方向就係向銀礦灣沙灘、銀礦瀑布、銀礦洞方向，只需要前往袁氏大屋，經過銀灣邨，轉向銀樹街，接連穿過2道小橋，然後走鹿地塘村小徑，一直會有指示牌指向南山古道。
鹿地塘村位處梅窩地塘仔郊遊徑，穿過鹿地塘村，由袁氏大屋起步，步行約15分鐘，就會到達南山古道入口，沿銀礦瀑布方向走，鹿地塘村中途就會見到山路入口，路段有少量指示牌。南山古道近南大嶼郊遊徑，而南大嶼郊遊徑基本上有約10公里長，但南山古道就只係30分鐘步程。當穿過鹿地塘村時，必須小心分岔路口，
簡單嚟講，穿過小橋後直行至涼亭，再向前走到末端轉左，再轉右，直行至南山古道指示牌轉右，一直前行就會搵到南山古道山路入口，注意中段有部份指示牌係將「南山古道」寫成「鄉村古道」。
南山古道全程走石砌梯級，風景稀少，只有中後段有少量空隙可回望梅窩一帶。整道古道皆為石砌梯級，感覺非常古舊，沿途滿佈樹蔭，古樸味濃，綠意盎然，果然係鄉村古道，缺點就只在於無乜風景可言，抬頭就係大東山林地。不過，此古道係連接梅窩至嶼南道嘅捷徑，而且比較少人步行，而若反方向從嶼南道下行至梅窩鹿地塘村，情況就會變得更為簡單。
據悉，南山古道有逾400年歷史，亦叫磨刀山道，因為古道內嘅石係可以用作磨刀，但目前唔算好平滑，唔平整之餘亦有啲崎嶇，但都算適合步行。古道本來並非只有30分鐘步程咁短，而係連接石壁水塘方向，只不過水塘工程令古道毀掉，以前其實係大嶼山長沙、塘福、水口、貝澳一帶居民來往梅窩嘅主要幹道。
南山古道盡頭係南山坳頂1號燒烤場，位處大嶼山郊野公園範圍內，地方偌大，綠草如茵，既可BBQ，亦可野餐。路段連接山路，可以前往二東山、大東山、伯公坳方向，當然想上大東山嘅話，直接從伯公坳起步會較方便快捷。
於燒烤場野餐後，前行一小段路就可以見到對面為營地入口。同一個燒烤場，左邊可上行至白富田營地，而右邊則可下行至南山營地。
如果大家發現南山營地人流太多，可以前往附近嘅白富田營地，雖然由入口至白富田營地約為30分鐘步程，來回就需要1小時，而且需要稍為上行，靠近鳳凰徑。缺點既在於需要步行，補給點亦需要先下行30分鐘，再步行或搭車折返梅窩，而且只有旱廁、燒烤爐、枱櫈等，取水都要折返南山營地；但優點就係位處深山之間，人患唔明顯，地方唔大，只有約20個營位。相反，下行至南山營地，不難發現營地滿滿帳篷，當日氣溫較低，故少咗啲人。
南山營地最大優點在於落車即達，入口離大嶼山巴士站只係1至2分鐘步程，但嶼南道無街燈，夜晚入營地就需要自備頭燈。營地有50至60個營位，空間廣闊，內有洗手間、燒烤爐、枱櫈、污水穴、晾衫架、水喉、浴室等，非常方便。想要補給點嘅話，步行或搭車折返梅窩亦唔困難。不過，正正因為太過方便，令南山營地變成人滿為患嘅營地之一。
依山而建嘅南山營地週邊被山谷、樹木環抱，環境清幽，都算舒適，想要散步重可以前往附近南山觀景台，步程約10分鐘，景觀開揚，可以回望梅窩至貝澳一帶怡人市海景。
據編輯查詢營地負責人南山營地平常狀況，一般周末假期整個營地會堆滿帳篷，大多為家庭客，通常係一家大細前往營地，高峰期連洗手間門口位置都被紮營。但當日氣溫驟降，家庭客大減，仍然前往南山營地嘅為唔怕凍嘅年輕人，當時營地已只剩低少量插針位。至於平日人流無咁多，但依舊多人，基本上每日都有唔少人露營，周末假期必須插針，只不過平日仍然會有營位，或者插針。換句話說，即係平日或星期六一大清早都有機會可以搵到營位。
E.A.Tips :
❷ 老闆係外國人，點餐時要用英文，但現時都為本地店員睇舖。
❸ 店外座位可面對海旁，會比較Chill；不過室內就比較有私隱，而且行埋店內地下至閣樓嘅小型Art Gallery會比較方便。
❹ 要預備充足Cash，唔見有Credit Card機。
❶ 素食朋友都可以去，因為有全素餐供應。
❷ 小店曾參與梅窩 Farm to Table 農業社區活動，亦有售賣唔少有機產品，有興趣可以睇睇。
❸ 周末營業時間上，Google寫16:00，Openrice寫18:00，但實際上親自問到先知係17:00，所以要留意唔好咁晏啦！
❹ 巴士路線3M可以來往梅窩至東涌，亦可直抵南山營地入口。由中環乘搭渡輪前往梅窩，價錢較高，但時候就較快捷；由東涌乘搭巴士前往梅窩，價錢平少少，但需時就較長。巴士路線1,2,3M,4都可以前往南山營地，但太古度假屋站落車會近過南山營地站落車。
❶ 經過鹿地塘村時要特別保持安靜，勿騷擾村民。
❷ 南山古道需要都算安全，但都要小心踩到碎石跘倒。
❸ 燒烤場唔係營地範圍，所以只可野餐同BBQ。
❹ 營地有洗手間基本配套設施，地面較斜，能紮營嘅地方其實唔多，所以人多真係要插針。
❶ 記得唔好喺營地燒地，要自備防火墊，重有自己垃圾自己帶走。
Caffe Paradiso
大嶼山梅窩銀運路3號梅窩中心地下8號舖
星期一至五 08:00 - 16:00；星期六至日 08:00 - 18:00
2984 0498
南山古道
嶼南道
南山營地
大嶼山
白富田營地
大嶼山