旺角兆萬中心2間日韓放題隨時食足5至6小時？

我最期待的畫面出現了！無針人士守候已久，香港政府終於恩恤香港人，正式取消「疫苗通行證」。由2022年2月24日至2022年12月28日，香港「疫苗通行證」歷時有308日，真香港人全年只能食外賣，編輯一直覺得黎明前嘅黑暗係最黑暗，只有堅持先可以勝利，曙光就近在眼前。其實，從呢件事上係睇到好多嘢，堅持外賣期間，見盡人情冷暖，不時令人有放棄堅持嘅念頭。堂食放寬係得來不易嘅福利，一定要珍惜呢段時間嘅堂食空窗期，勝利可能係短暫，但總算等到一個結果，始後發生咩事，Who Knows？

剎那光輝唔代表永恆，煙花都有燒完嘅一日。適逢聖誕假期，即將踏入新年，某人嘅18日冬至渡假營都未去完，香港人繼續普天同慶，不分你我迎接2023年。堂食日子可能有盡頭，大家一定要珍惜20日嘅空窗期，食得就食，食咗先算，以後喪屍出籠，香港人只能自求多福啦。Happy New Year！

旺角兆萬中心向來係拍拖兩個人於鬧市區域嘅放題好去處，一幢小型商場內有多間樓上放題店，好多間都係平民價放題。適逢堂食正式放寬，編輯亦前往久違嘅放題店，今次於商場內一次過先食兩間放題店，其中一間係神戶屋日韓放題。當日午市放題有95折，堂食有加一服務費，人均原先$289，加一後折實$303.5。

同路人放題店並唔多，全港數目數之又少，所以搵到幾間已經好好。位於放題匯集點兆萬中心嘅「神戶屋日韓放題」，最基本有2小時任飲任食放題，食物選擇包括新鮮原產直送刺身，刺身、壽司、串燒、爐端燒、鐵板燒、沙律前菜、唐揚炸物、天婦羅、日本和食、韓國料理、拉麵烏冬、火鍋、飲品、甜品，有指合並有約200款美食。

從點餐APP觀察，分類有沙律前菜、炸物天婦羅、和食料理、燒物、手握壽司軍艦、迷你手卷、壽司刺身、火鍋、麵類，亦可以加$99要海膽生蠔任食套餐。有部份菜式於下晝已經售罄，剩下來比較吸引嘅選擇係海鮮茶碗蒸、韓國人蔘雞湯、壽喜燒牛肉鍋、黃金芝士燒廣蠔、日式燒牛舌、鹽燒活海蝦、燒有機菠蘿、炸粉唔太厚嘅天婦羅等。

放題不得不叫嘅係刺身，當中有鯛魚、赤貝、馬刀貝、鮑片、角螺、激巨赤蝦、甜蝦、北寄貝、泰式生蝦、希靈魚、松葉蟹棒、厚燒玉子、三文魚等，如同刺身拼盤，都算新鮮同鮮甜。而甜品同飲品就位於大廳雪櫃內自取，基本上飲品只有多款罐裝汽水或樽裝茶，而甜品就以小杯盛載，以奶凍之類為主。

至於樓上一間叫極上帝王水產嘅放題店，同樓下如出一徹，原來兩間係一樣，難怪由裝潢到點餐方法，以至食物都無乜太大分別。裝潢亦有掛有大量和風旗幟，食物選擇包括磯燒海鮮、日式火鍋、炸物、壽司、刺身等日式料理，基本上同樓下相近。

連入座即送嘅免費火鍋料理都一樣，包括鱈場松葉蟹海鮮鍋、日式和牛壽喜燒鍋，8樓食完壽喜燒鍋，9樓就係海鮮鍋，湯底都不俗。兩層樓嘅刺身、壽司、燒物、炸物基本上無太大分別，而9樓嘅飲品多為汽水，而8樓嘅茶類較多，兩者都有一個甜品櫃，門外亦有雪糕、雪條。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 神戶屋日韓放題Openrice有6小時任飲任食日韓午市放題、3小時任飲任食日韓晚市放題，再送日本刺身生蠔半打優惠，價錢由$189起。而極上帝王水產於Openrice預訂午市放題6小時有95折優惠，可以揀磯燒A5和牛、甲羅燒、星級雪糕或清酒，晚市亦有95折優惠，但就可以揀直送海膽、即開生蠔、星級雪糕、甲羅燒、磯燒A5和牛或清酒梅酒。而9樓打電話預訂每位亦有9折優惠。

❷ 室內設有VIP房間，房間外面亦多卡位。

❸ 兩間都係由中午12點至凌晨1點。

❹ 放題用APP落單，每次Scan QR Code點餐就得。