蠔涌出發漫遊大腦古道 尋港英紅色皇冠郵筒+搾糖石磨歷史遺跡 幽靜古樸林蔭石徑連接企壁山古道/沙田黃泥頭

西貢古道多如牛毛，可來往西貢至沙田、馬鞍山等地，每一條古道都歷史悠久，以石舖砌，一步步登上頂端，拍拖兩個人穿梭其中，踏出每一步都可感受舊人嘅努力，蠔涌就有一條大腦古道，石砌路段既有荒廢村落，亦隱藏搾糖石磨，每一處地方都係本地嘅歷史痕跡。

有留意eatwo嘅讀者一定知道，編輯曾經遊走西貢北港嘅茅坪古道，亦曾到訪蠔涌隔離嘅白沙灣企壁山古道，今次就向西面再行另一條古道。大腦古道其實可以接駁上述兩條古道，遊走大腦古道之後，可以繼續前往沙田黃泥頭方向，亦可以折返白沙灣或西貢。

由西貢公路蠔涌起步，依循蠔涌河走蠔涌路，先經過蠔涌車公廟、亞洲電視舊錄影廠遺址，只需一直上行，沿蠔涌路直行到底，中途會經過一間又一間西貢村屋，包括柏濤軒、金豪花園。

同時，蠔涌路亦可前往昔日咸豐片場，而片場之後嘅分岔路可通往大窩村，更特別之處係村口有一個超迷你嘅紅色英國皇冠郵筒！眾所週知，香港紅色圓柱形嘅英國皇冠郵筒係殖民地嘅象徵，港英時期屹今嘅紅色圓柱形皇冠郵筒已經少之又少，即使仍保存至今，唔係放置博物館、郵政總局，就係演變成被髹上綠色嘅皇冠郵筒，甚至變成清一色白色蜂鳥香港郵政綠色信箱，至於係咪同「去殖」有關就不得而知，不過歷史就係歷史，唔會消失，難以被刪除剝奪。

以目前觀察，破舊小郵筒甚為殘缺，但仍舊可見到皇冠圖案，亦可以隱約見到「ER」字樣。而「ER」有「Royal Cypher」之意，每個郵筒設立時通常都有在位君主嘅標記。郵筒上嘅「E」字代表「Elizabeth」，中文即「伊莉莎白」，至於「ER」中間嘅「II」，等同「二世」，「EIIR」就代表「英女皇」伊莉莎白二世，因為「R」係代表「Regina」，即「女皇」。不過該郵筒貌似已經荒廢，下方郵差取信位雖然被鎖頭鎖上，但郵筒就唔見有信件，反而旁邊就另有一個郵箱用作放置大窩村村民嘅信件。

繼續循蠔涌路上行，直到界咸村盡頭嘅大藍湖路、界咸路分岔路口，轉入界咸路之後，經過涼亭前行至峻峰閣，對面就係大腦古道入口，步程約30分鐘。攀登大腦古道，路段唔算難行，只不過全為石砌步道，而部份路段亦甚狹窄，大霧時雖然更有氣氛，但濕氣亦重，加上唔少石頭表面長滿苔蘚，容易跣腳。

大腦古道以下為蠔涌，而大腦古道以上則為黃牛山，連接大腦古道嘅有企壁山古道、麥理浩徑第4段，可以來往西貢或沙田黃泥頭方向。而上洋村就隱藏於大腦古道內，村落長期於深山之中，同大腦村一樣已經荒廢不成形，其中連宗祠都無人理會，大腦古道原本只係昔日石磴道路。

古道全由一塊塊大石舖砌，一步一塊石，路線以上行山坡為主，屹今仍然清晰可見，行山客可以逐漸登上頂端。古道內清幽寧靜，古樸味濃厚，沿途遍佈樹蔭，鮮見陽光，即使係夏天都可以隨時遊走。

當步行至古道末端，會見到大腦古村遺址，石牆雖然依舊保存良好，但舊屋附近長滿藤蔓，已完全荒廢，而繼續循古道前行，則會到達曾氏宗祠，同樣係無人打理。至於大腦古道嘅重點，係離宗祠僅1分鐘步程嘅搾糖石磨，石磨係大腦古道嘅亮點，亦係當中嘅歷史遺跡，可嘗試幻想昔日居民生活，由入口至石磨，步程約需30分鐘。

於宗祠一邊穿過溪澗，就可以找尋古老搾糖石磨，現時仍然可以石磨兩個齒輪，呈墨綠色，至今仍然尚算保存良好，只係無咗木製部份，淨低齒輪石柱部份。至於點解叫搾糖石磨？因為該石磨嘅操作原理重點就在於兩個齒輪，用作榨取甘蔗製糖，係一個製糖工具，只需要上面放木板，將甘蔗放於齒輪中間，待齒輪轉動之後，壓榨甘蔗，自然可以榨取蔗糖，下方凹槽則可為收取蔗糖汁液容器，民間智慧的確令人佩服，只係呢種製糖技術據悉已經有至少有逾百年歷史。

若然意猶未盡，可以折返曾氏宗祠，跨過旁邊小路，繼續上行至基維爾營地，前往黃牛山，或者穿過花心坑前往沙田黃泥頭方向。

延伸閱讀﹕西貢行到沙田！白沙灣出發穿梭企壁山古道 麥理浩徑接長城古道徒步黃泥頭小瀝源