【區區有小店】北角美食巡禮2023！小區推介11間尚存本土餐廳！

近年，香港不斷有餐廳宣佈結業，唔少有質素嘅餐廳都逐步消失，同香港講拜拜，本地尚存嘅小店數目愈來愈少。今次編輯就一次過總結返我哋實試過嘅餐廳推介，結合現時仍然有嘅餐廳美食，方便大家繼續支持本土小店，第十九炮於找尋北角尚存嘅本土餐廳。

古月

曾經前往北角嘅讀者，對於北角錦屏街後街一定唔陌生，皆因一條小巷內，隱藏多間美食餐廳，而且內裏有至少5間良心店，其中「古月」更加係《米芝蓮指南》必比登推介，以新加坡肉骨茶為主打，同馬來西亞肉骨茶唔一樣，並非由藥材熬煮，反而係偏向加入胡椒粉，所以小店名稱都係來自古月粉嘅「古月」。另外重有由「北豆Bar & Grill」易名為「不 THE BEANS」、「Villa Villa」、「酒盗Shuto」，以及下一間推介嘅「青藏牛肉麵」。

延伸閱讀﹕港島7良心店入選《米芝蓮指南2021》必比登推介北角突襲封區內摘星餐廳實試正宗新加坡肉骨茶

青藏牛肉麵

同一街道上內，近盡頭位置嘅「青藏牛肉麵」係本地以比較少見嘅青藏高原菜式為主，無論青藏牛肉麵定青藏羊肉麵，不僅份量充足，而且湯底濃香，羊肉麵唔羶唔油。

延伸閱讀﹕北角錦屏後街青藏高原界麵食牛肉/羊肉拉麵不羶不油濃香撲鼻

VV尾線

米線係香港人鍾意食嘅菜式之一，好多人只會諗到連鎖米線專門店，甚至食到上晒癮，但其實香港米線店有好多，其中北角區「VV尾線」就如同連鎖米線專門店，最大分別係唔會食完好口渴。

延伸閱讀﹕北角隱藏小型米線店隨時可取代人氣譚仔雲南米線？

麥記美食

北角區同中區分別在於餐廳價錢一般較低，區內雖然貌似比較地踎，但當中都有獲得《米芝蓮指南》星級推介嘅小店。除咗「古月」，重有「麥記美食」，一直以來都只有舊店，只提供外賣，但2023年中就於幾步之遙新開一間堂食店。兩間店售賣嘅嘢基本上相近，上海小食如小籠包、生煎包、鍋貼、酸辣湯、担担麵等水準甚高，而新店就多咗雲吞雞湯麵，只為堂食限定！