台北近郊一日遊！走訪十分放天燈、九份歎大大粒芋圓+隱藏花草Cafe 超簡單行程直抵基隆夜市｜附台北、十分、九份、基隆交通路線

台北近郊行程中，以十分、九份最熱門及最為人熟悉，既可拍拖兩個人於火車路軌中放天燈，亦可歎台灣大大粒芋圓糖水。今次編輯走訪十分、九份，除咗經典景點，亦可去一間隱藏花草cafe，然後一條路線前往基隆夜市作結，交通方便。

十分

「十分」位於新北市平溪區，係知名旅遊景點，「放天燈」許願逐漸成為指定動作。「十分」位於「平溪線」中途站，火車路線一直依循基隆河河谷延伸，蜿蜒曲折。其實，呢道鐵路支線係由於早期1918年開採煤礦而成，直到1992先沒落。多年後，先將多個地方串連起來，令民眾、遊客可以一日內輕鬆走過「十分老街」、「平溪老街」、「菁桐老街」等，多道老街就位於火車前面，出站即達。

近年，「十分老街」已逐漸變成旅客熱點，老街中亦滿佈餐廳、商店，售賣紀念品，postcard等有趣精品小物，「十分幸福」見得特別多。現時，老街中有一間小店為編輯推薦，門口寫有「Daebak make my day 大發」，重點係店內有香港人非常認識嘅pepe公仔！

延伸閱讀﹕【台北美食】自己人呀！台北6+3間精選貼地港店雪花冰/碟頭飯/咖喱魚蛋/傳統麵包異地尋港味｜台北好去處

此外，老街中有多間天燈工藝品店，既然係一個「許願之地」，一場嚟到，當然都要用毛筆寫低心願，施放天燈！天燈有唔同顏色，可隨喜好挑選，寫完後只要同店家講聲，店家就會將天燈帶到路軌中央。最後將天燈點火，隨風升起，就可以望向漫天祝福。通常放天燈時，店家都會幫忙於期間影相。

經典青春電影《那些年我們一起追過的女孩》，都曾於十分拍攝，男女主角都係於火車路軌中放天燈呢！不過，注意放天燈時間只限朝早7點至夜晚9點，每日開放。除咗處於火車路軌中嘅「十份天燈」，附近嘅「靜安吊橋」亦係打卡位，橋身連接十分村、南山村，全長有128米，雖到處斑駁，難掩歲月痕跡，但係少見保存得好嘅行人吊橋。而比較遠嘅「十份瀑布」來回至少有1小時，皆因位置係十分站同大華站之間，係一道幕簾式瀑布，但「十分風景區」亦係「十分站」必去景點。

九份

「九份」亦係著名景點，憑一部1989年嘅電影《悲情城市》，搖身一變成為旅客熱門朝聖地，明明只伙一個座落山坡地嘅小鎮，竟然紅足超過30年！由「九份老街」至最熱明嘅打卡位招牌悲情階梯，整個空間都含有獨特舊式建築，古樸味濃厚。

「九份老街」其實即係「基山街」，當中商店林立，完完全全係一個旅客景點。小巷有眾多美食點及手信店，亦有多個知名景點，最出名嘅係「阿妹茶樓」、「昇平戲院」，其他就有「九份江家餅舖」、「九份茶坊」、「九重町客棧」、「水心月茶坊」、賣薑母茶嘅「阿信的店」、「九份王家美味點心」、「小千の冰朴店」、「吾穀茶糧_九份食茶館」、「九份花文字畫廊」、「九份大發選物」、「Sip咖啡」、「轉角」，甚至有「九份夜間導覽的開創者九份金礦博物館」。

由於九份以大大粒芋圓聞名，故亦包括多間以芋圓豆花為主嘅食店。芋圓店不少，比如有「九份豆花」、「九份礦山豆花」、「賴阿婆芋圓」、「九份阿柑姨芋圓」。以遊客人氣度嚟講，應該係以「賴阿婆芋圓」優勝，但以評分嚟講，「九份礦山豆花」、「九份豆花」、「九份阿柑姨芋圓」較有保證。

從「九份老街」、「招牌階梯」走到盡頭，一隅可眺基隆北海岸，稍為歇息。依循村內小路走，不妨尋找一間貓咪cafe「野事草店／Wild Herbs Gallery」，店內以雞蛋燒與藥草茶為主，將雞蛋糕變成打卡甜品，相當精緻，呷一口獨特藥草茶，愜意非常。

延伸閱讀﹕【九份美食】純白綠意海景Cafe緊鄰九份老街！山城間野事草店藥草茶館歎萌爆創意雞蛋燒！

九份一帶有登山步道，包括雞籠山、黃金瀑布、金瓜石等，甚至係十三層遺址、水湳洞展望台，都係九份賞景好地方。如果一日遊只走九份，又或者駕車到達，先建議呢幾條路線，編輯比較推介九份水湳洞陰陽海、野柳路線，環境更chill。

瑞芳

由九份折返瑞芳，保證可以有車去基隆市。而「瑞芳車站」週邊都有唔少攤販，可以買小吃醫吓肚，包含有米粉肉羹、牛肉麵、台式香腸、排骨酥麵、龍鳳腿、鹽酥雞等。走到盡頭，會發現一個當地人嘅美食廣場！

美食廣場環境比較地踎，選擇眾多，相對街邊攤販嚟講，優點就係有得坐低堂食。「瑞芳美食廣場」內選擇亦不少，包括有肉羹、魷魚羹、炒麵、雙醬麵、香酥排骨、牛肉麵等，甚至「紅茶老店」、「老街口愛玉」等茶飲店，價格實惠。

基隆

由「瑞芳站」前往「基隆站」，以台鐵計車程最快大概30分鐘。基隆市三面環山，依山傍海，「海洋廣場」就係賞景之地。基隆位置毗鄰新北市，係台灣重要都市，為航運樞紐，等同台北玄關。基隆市以「基隆廟口夜市」最為人熟悉，多種獨有基隆小吃及豐富海產充滿特色。

一日遊行程從早到晚，走完十分、九份，經瑞芳前往基隆，最後於「基隆夜市」醫吓肚，以此結尾就更perfect，最後可以乘搭台鐵折返台北。

「基隆夜市」美食眾多，如果想坐低飽餐一頓，或者想試試地道台灣人受歡迎之選，不妨一試「義美自助火鍋城」嘅「石頭火鍋」，為平價自助火鍋。不過，編輯下晝5點幾到達，門口已經大排長龍，而且係毫無希望嘅人龍，想試真係要更早時間到達啦！編輯由第一選擇「義美石頭火鍋」，到第二選擇「石二鍋」，然後到「肉多多火鍋」先至有位。

至於「基隆夜市」，既係全台知名夜市，亦係一個24小時開放嘅夜市，24×7都有店家營業。而「基隆夜市」又叫「廟口夜市」，其中「廟口」就係指仁愛區仁三路奠濟宮一帶嘅小吃市集，眾多攤販構成「L」形，夜晚特別熱鬧。

夜市攤檔多蘿蘿，必食之選有麵線焿、蝦仁焿、肉焿、排骨飯、台式香腸等，包括「基隆廟口22號蝦仁羹」、「天一香肉羹順」、「進益麵線焿」，其中蝦仁焿鮮甜惹味，不過剛好天氣較熱時於店中品嚐，少不免令人大汗淋漓。其他選擇有「天天鮮排骨飯」、「全家福酒釀湯圓」、「基隆遠東泡泡冰」、「世盛一口吃香腸 – 基隆廟口43-1號」、「吳姳麵館」等，想去cafe甚至可前往「空白服飾&金派甜點&SWC手工皮件」。

除咗夜市小吃，前往基隆當然要將手信帶返台北、香港，其中最受歡迎嘅要選李鵠餅店、李製餅家，兩者為兄弟店，分別在於前者係採用豬油製鳳梨酥，而後者就採用奶油嚟製鳳梨酥，大概係葷食與素食之別。此外，編輯發現重有一間頗受當地人歡迎嘅手信店，名為「連珍糕餅店」，包含芋泥球及各種甜點，留意幾間手信店於8、9點就會陸續關門。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

台北、十分、九份、基隆行程一日遊交通實況﹕

E.A.Tips :

❶ 於捷運「台北車站」轉乘台鐵，至「瑞芳火車站」，車費約TWD350／人。注意列車分幾種，包括復興號、莒光號、自強號，其中自強號列車車程較快，約30至40分鐘就會到達，復興號為區間車，車程約48分鐘，最重要係事前一定要先睇列車時間表。

❷ 乘搭「平溪線」可到達「十分站」，路線會經過瑞芳站、侯硐站、三貂嶺站、大華站、十分站、望古站、嶺腳站、平溪站、菁桐站，若一日走幾個站先買「一日券」TWD80／人，但若走「十分」、「九份」，購買單程都不相佰仲。

❸ 基本上台北近郊無列車直接由「十分」去「九份」，所以一係先折返「瑞芳火車站」，再前往附近嘅「區民廣場」，轉乘客運788／827／1062，即可直達「九份老街站」；一係於「九份」火車路軌中途下行至馬路，直接截的士前往「九份」，的士車費一般以人頭計，預TWD400至TWD500／人。「九份」都有停車場，城市車旅九份台陽站離老街有近150米，以全時段計每次TWD200。

❹ 由「九份老街站」對出可直接乘搭客運前往「基隆」，只要轉乘客運788／827／1062，於「署立醫院站」落車，過橋後就一小段路就會到達基隆夜市。不過，「九份」客運班次不一，有時重幾混亂，編輯親眼目睹有客運飛站，最後一班車都上唔到，所以更安全嘅做法係先折返大多數客運都可以到達嘅「瑞芳火車站」。然後，於「瑞芳站」乘搭台鐵至「八堵站」再轉車直達「基隆站」。

❶ 從台鐵「基隆站」折返台北，人均票價約TWD41，區間車分站會經過板橋、萬華、台北、松山、南港、汐科、汐止、五堵、百福、七堵、八堵、三坑、基隆，留意「基隆站」發車最後班次時間為23:03，要返台北就唔好太夜。而乘搭客運2088，亦可來往基隆至台北市政府，客運9006則可來往基隆至士林，不過從八斗子、基隆女中出發最後班次為22:00、20:50。