【區區有小店2024】編輯精選全港11間選用頂好大光麵餐廳！香港製造茶餐廳舊名物瞬間竄紅｜附地址名單

最近分析本地茶餐廳文化嘅電視台ViuTV節目《茶餐廳》重新介紹香港茶餐廳舊有名物「頂好大光麵」，令「頂好大光麵」突然獲帶挈瞬速竄紅，連帶「香港製造」亦獲得關注。想要拍拖兩個人搵吓目前有「頂好大光麵」提供嘅餐廳？雖然官方有公佈全港選用「頂好大光麵」嘅餐廳，但編輯精選推介嘅本地餐廳就只有以下11間，即睇港九新界「頂好大光麵」餐廳一覽！

節目《茶餐廳》第5集以香港即食麵廠商金源食品推出嘅招牌「頂好大光麵」為題，更於節目中比較「頂好大光麵」與「出前一丁」及內地品牌即食麵。事實上，「頂好大光麵」本身由60年代起廣被本地茶餐廳選用，以無味粉「光麵」為主，茶餐廳內有呢種「光麵」同另一種份量較小嘅細光麵，對比之下，後來被茶餐廳約定俗成叫「大光麵」。

老字號香港製造嘅「大光麵」橫跨70、80、90年代，高峰期有80%茶記都會選用「大光麵」，不過後來不敵內地品牌競爭，只係淨返20%餐廳願意選用「大光麵」，逐漸式微。編輯記得以前曾經食過「大光麵」，但後來質素下降，感覺大不如前，逐漸放棄，原來係因為大部份茶餐廳因成本問題偷偷轉為平價內地品牌。

「頂好大光麵」一包有6個裝，麵條有彈性，帶有獨特香味。「大光麵」屬幼身麵，較硬身，唔會煮一煮就好快淋晒。「大光麵」經油炸之後再風乾，大概煮1分半鐘就會熟，特別方便急速節奏嘅香港茶餐廳使用。編輯私心建議食法係將「大光麵」配上沙嗲牛肉，麵條掛上沙嗲汁係特別惹味。雖然目前「頂好大光麵」突然多咗個光環，香港人係一窩峰支持香港製造「大光麵」，但香港人風向日日轉，到底呢種熱潮可以維持幾耐，真係要拭目以待！