【區區有小店】菜式篇！港九新界尚存車仔麵店 16間本土推介車仔麵店｜車仔麵推薦2023

【#區區有小店】香港本來就係國際美食匯聚嘅地方，雖然環境有好大變化，唔少餐廳都陸續出現結業潮，但其實依然有唔同餐廳小店尚存，更有唔同類型嘅菜式可以選擇。今次區區有小店就為大家整理港九新界尚存嘅車仔麵，適合拍拖兩個人前往，即刻睇睇菜式推介之車仔麵選擇！

港島

麵尊

登龍街係銅鑼灣食街之一，一道小巷內包含多間食肆，但當中只有少數食店係本土推介，其中一間係以售賣車仔麵嘅「麵尊」，於價格平均水平高嘅銅鑼灣中，帶出平民選擇。

延伸閱讀﹕銅鑼灣激罕乾淨車仔麵食材環境極衛生唔嗱喳

車仔麵世家

位於中環巷弄間嘅「車仔麵世家」，都算係人氣之選，好多人都話湯底好味，的確湯底係濃郁，不過編輯唔建議當湯飲，皆因鹹度較高，有啲奇怪。

延伸閱讀﹕【野餐隨行】海濱全海景野餐近港澳碼頭！中環小巷隱蔽中價車仔麵

九龍

海都車仔麵茶餐廳

講到隱蔽嘅車仔麵店，編輯會選擇躲藏於旺角熟食中心內嘅「海都車仔麵茶餐廳」，價格相宜，而湯底清甜，車仔餸亦不俗，性價比高，不過會前往熟食中心嘅通常只係麻甩大叔或附近打工仔。

延伸閱讀﹕旺角麻甩飯堂大搜查「佬味」十足平民熟食中心藏泰式風味海南雞/超抵食車仔麵

十六座車仔麵

擁有分店嘅「十六座車仔麵」，無論麵底定車仔餸，款式眾多，麵底有紅有綠，給予客人唔少選擇，適合鍾意選擇較多嘅朋友，每一次可以挑選唔同顏色嘅麵底。

延伸閱讀﹕麵底紅紅綠綠太子十六座車仔麵食得刁鑽

任你點車仔麵

同樣擁有分店嘅「任你點車仔麵」，係比較早期嘅車仔麵店，水準不過不失，價格相宜，屬於街坊飯堂之一，經濟實惠，都係糧尾之選。

延伸閱讀﹕抵食高質車仔麵 2碗4餸1麵100蚊有找

地道館車仔麵

另一間平價車仔麵要數「地道館車仔麵」，同樣係擁有分店嘅車仔麵店，價格上唔使40蚊就有3餸車仔麵，而魚蛋亦選擇成本較高嘅陳皮魚蛋。

延伸閱讀﹕新蒲崗小店3餸車仔麵陳皮魚蛋夠彈牙 $38下午茶送餐飲

何車車仔麵

所謂「何車車仔麵」，意思其實即係老細曾經係一名設計師，現時轉型做車仔麵店，店舖位於太子一帶，車仔麵湯底清甜，而車仔餸、麵底選擇眾多，單單都底就有16款可擇，編輯私心推薦蒟蒻麵，既於車仔麵界中罕見，亦爽滑有咬口。

延伸閱讀﹕太子人氣車仔麵湯底鹵汁混腩汁 16款麵底任揀必試低卡蒟蒻麵

十三么

以「十三么」命名嘅車仔麵店，位於美孚新邨，雖然以四方城麻雀術語為名，但車仔麵就同麻雀毫無關係，始終係街坊生意，車仔餸、湯底都係正常發揮，而蘿蔔就比較特別，好似有陣陳皮香味。

延伸閱讀﹕【野餐隨行】麻雀為名？美孚車仔麵毗連車輪餅專門店荔枝角公園偌大空間隨處野餐

秘坊

講到人氣車仔麵，荔枝角「秘坊」大概必然入圍，基本上只提供外賣車仔麵，店內既有碟頭飯之類，亦有自選車仔麵，當中蕃茄湯係最多人挑選嘅車仔麵湯底。的確，湯底係包含蕃茄，但編輯覺得蕃茄湯底未夠自然，反而菠菜麵底較為吸引。

延伸閱讀﹕荔枝角工廈秘道藏外賣店自選車仔麵菠菜粉皮蕃茄湯底有新意

日昇車仔麵

位於荔枝角道嘅「日昇車仔麵」，係真正街坊車仔麵，店舖雖然地方不大，而且門面唔突出，但一眾街坊自然會走入呢間車仔麵店。麵店內既有售賣車仔麵，亦有多款港式小食，更有生菜魚肉、紫菜魚肉。而車仔餸款式較其他車仔麵少，只有大概11款可以選擇，但價錢就真係非常相宜。

延伸閱讀﹕太子隱藏版11餸車仔麵拼黃色可樂生菜魚肉價賣紫菜魚肉湯

豐味車仔麵

想要求交通方便，又想食車仔麵，咁就去旺角女人街啦。女人街美食眾多，類別、菜底有如聯合國，但價格就較高。而「豐味車仔麵」價格較低，就喺女人街中突圍而出，不過店內酸辣粉比車仔麵優勝。

延伸閱讀﹕旺角通菜街酸辣車仔麵酸中帶麻辛辣味豐

新界

松記車仔麵

若然西貢玩水或行山，必然要於西貢搵食，小巷內美食眾多，第一間餐廳就係「松記車仔麵」，靠近小巴站，小店係咁多間小店中最為人熟悉而最穩陣嘅食肆，加上快靚正，自然吸引唔少人排隊等食。

延伸閱讀﹕【區區有小店】西貢美食巡禮2023！小區推介11間尚存本土餐廳！

孖寶車仔麵

走入葵涌廣場，諗到嘅一定係多間立食店，而地下「孖寶車仔麵」亦係一直默默提供飽肚選擇嘅地方，既可以堂食，亦可以外賣，街坊、學生等都對車仔麵甚為踴躍。

延伸閱讀﹕葵涌廣場小店極速外賣車仔麵

時新車仔麵屋

隱藏版車仔麵店有好多，當中沙田瀝源嘅「時新車仔麵店」就係性價比高嘅小店，最大優點係平靚正，$36帶上3餸1麵，而水平亦唔差，大多數搵到嘅都係街坊客。

延伸閱讀﹕【區區有小店】沙田瀝源3間街坊小店尋$36碗3餸麵/傳統酒樓歎下午茶

多多車仔麵

雖然名義上係賣車仔麵，但大埔廣場地下嘅「多多車仔麵」，重點並非係車仔麵，每逢前往大埔廣場，編輯都會想食店內獨特嘅炸豬扒！除咗金黃色豬扒屬真正色香味俱全，店內更有自家製辣椒油，以花椒油泡製，同樣香氣十足。

延伸閱讀﹕大埔廣場3間地舖一次歎日式料理/車仔麵/海南雞飯帶你海濱公園野餐隨行

離島

多多麵

好多人前往離島，好少會挑選車仔麵呢啲普通平民貨色，大多數都會選擇打卡美食，總之係賣相一定要夠靚。不過，編輯另有想法，長洲小島內嘅「多多麵」，絕對係不得不試嘅小店，下晝2至3點，客人依然流水式一個接一個，而大多數都係長洲街坊。車仔麵麵底清甜，而車仔餸亦有驚喜，份量亦眾多，部份車仔餸甚至係坊間車仔麵點嘅一倍，編輯忍唔住想封其中3款車仔餸為「車仔麵三寶」！