【區區有小店】菜式篇！港九新界尚存茶餐廳 30間本土推介茶餐廳｜茶記推薦2023

香港本來就係國際美食匯聚嘅地方，雖然環境有好大變化，唔少餐廳都陸續出現結業潮，但其實依然有唔同餐廳小店尚存，更有唔同類型嘅菜式可以選擇。今次區區有小店就為大家整理港九新界尚存嘅茶餐廳，適合拍拖兩個人前往，即刻睇睇菜式推介之茶記選擇！

港島

半島冰室

講到人氣店，港島區炮台山「半島冰室」應該係數一數二，每一日大多數鐘數都會見到門口有人大排長龍，而室內亦需要搭檯，當中有招牌菠蘿包，以及多款茶記精選套餐。

延伸閱讀﹕炮台山兩間冰室近油街實現半島/黃金新舊融合型男索女餐+超厚菠蘿包人氣十足

黃金冰室

距離「半島冰室」不遠嘅「黃金冰室」，中間隔咗一個油街實現，相對於前者，後者係比較普通嘅街坊茶餐廳，價格相宜，都算係糧尾之選。

快樂茶檔

香港仔有唔少餐廳，以前茶記類別中有「果然冰室」，現時就只有「快樂茶檔」，當中下午茶幾抵食，菜式都係西多、炸髀等為主，屬街角中嘅街坊茶餐廳。

延伸閱讀﹕香港仔抵食下午茶！轉角街坊店必食激厚西多邪惡炸髀畫蛇添足？

日常小館

小西灣一帶餐廳極少，該區居民搵食艱難，而鄰近海濱公園嘅「日常小館」就係區小確幸，有如街坊茶餐廳模式，而菜單就偏向西式為主。

延伸閱讀﹕小西灣食店清泉軟滑蛋包飯暗藏芝士拉絲

峰G館

筲箕灣東大街餐廳眾多，但值得推介嘅餐廳唔多，其中位置為東大街最盡頭嘅「蜂G館」，一度因為沙嗲而受到沙嗲關注組關注，其實小店只係一間街坊茶餐廳，但性價比上都算可以encore。

延伸閱讀﹕出名食沙嗲！筲箕灣東大街一隅街坊小館吉豬炸髀香脆可口隨時Encore

小麥廚房

西灣河有一間街坊小廚，名為「小麥廚房」，為區內一間街坊茶記，包括各款小炒系列，套餐更包括足料例湯，而價錢相宜，故大多數都係街坊打扮嘅客人。

延伸閱讀﹕【野餐隨行】落雨有瓦遮頭！小西灣隱藏式街坊小廚碼頭海旁公園野餐賞雨景

東橋餐廳

以日式餐廳設計嘅「東橋餐廳」，門面令人意會到售賣日式美食，例如丼飯等，但實際上店內賣嘅只係仿日式嘅港式美食，例如係便當類別。

延伸閱讀﹕【野餐隨行】筲箕灣道2間餐廳毗連炸雞店電車站直闖大浪灣泳灘沖浪勝地野餐

九龍

澳洲牛奶公司

提到最為人熟悉嘅港式茶餐廳「澳洲牛奶公司」絕對係排行榜首，多年前澳牛以服務態度冷漠見稱，飲品最尾先上檯，而侍應從來都唔會漏單。澳牛最大優點炒滑蛋，大多數人都為炒滑蛋而設，編輯親眼見過搭檯國內情侶特別點選滑蛋多士、雙皮奶，不過女士只食炒蛋，唔食多士，有錢真係特別任性。以前食澳牛，就為咗港式服務態度；而家食澳牛，縱然餐牌依然有舊式選項，例如滾水蛋，但侍應不單會講「唔好意思」，最後竟然講「多謝」？不禁懷疑，自已係咪入錯餐廳。