瞰鴨脷洲南區靚景！玉桂山經連島沙洲登鴨脷排 4星中高階路線勿睇少！

提到港島南區行山路線，唔少人都會諗到玉桂山、鴨脷排，皆因風景優美，又有連島沙洲，可以拍拖兩個人盡覽南區全海景緻。但事實上，玉桂山有幾高難度又有幾多人知道呢？有時候，香港人行山會忽略嘅係難度，編輯都想提提大家，玉桂山係一座中高階路線，如果以星級評分，大概有4星難度，所以千祈唔好睇少玉桂山至鴨脷排路線！如果行唔到咁高難度，不如去隔離小玉桂山算啦！

乘搭巴士路線到達鴨脷洲利東商場後，向麥當勞方向前行，轉入旁邊小路，前行至近車長休息室，就會見到玉桂山山路小入口。利東邨同附近嘅漁安苑、深灣軒，都係位處玉桂山山腰，而玉桂山可以回望區內嘅鴨脷洲邨、海怡半島，一道連島沙洲更可以通往更南端嘅鴨脷排。

玉桂山香港島南區嘅一座山峰，海拔俎196.2米，其實唔算太高，但就已經係鴨脷洲最言嘅山丘。而玉桂山嘅歷史其實可以追塑至清朝時期，玉桂山本名有指係來自於紀念1841年離任香港行政官嘅莊士敦（Alexander Robert Johnston）。

由玉桂山入口起步之後，再穿過圍欄，經引水道走，再穿過樓梯、水渠，就會到達近鴨脷洲配水庫嘅樓梯，始後全為沙泥路，而且多崎嶇不平小路。然後，你會發現有三條路線，如果真係要行，就依據自己嘅程度而走，唔好冒險前行。

基本上，左邊一般係相對比較易行嘅路線，中間則較左邊難行，路段滿佈沙石，而右邊就係比中間更難行嘅路線，陡峭難行，沿途非常驚險，難度最高。遊走玉桂山，其實山路需時甚短，大概15分鐘就可以到達山頂位置，只係山路唔太容易步行，有部份路段甚至需要手腳並用攀爬，容易跣腳，而部份亦屬叢林，部份又需要曝曬。雖然中段係有有心人綁上粗繩索作輔助，但記得登山時唔好完全依賴前人留低嘅輔助物，因為繩索扯得多都有機會因斷裂而出意外。

香港仔鴨脷洲一帶英文又做Aberdeen，因為開埠初期附近漁村係叫做Aberdeen，而鴨脷洲呢個小島嶼就叫Aberdeen Island，中文就叫做鴨巴甸島，直至70年代後先至譯為圖鴨脷洲。玉桂山山上有一個炮台，就正正以Aberdeen命名，直譯叫做鴨巴甸炮台（Aberdeen Battery）。

呢座鴨巴甸炮台係玉桂山著名景點之一，又叫做香港仔炮台，炮台於1939年修建，於二戰後曾被棄用，及後曾被日軍破壞，英軍原意係用作加強鎮守香港南端海邊至南丫島一帶，現時就只有小部份炮台遺跡殘存。

玉桂山山頂為南區全島地勢最高之地，山頂有標高柱，可環瞰東博寮海峽，海洋公園山上嘅機動遊戲清晰可見，過山車尖叫聲亦能聽見，山頂更可遠眺南丫島全島，包括三支發電廠標誌煙囪，基本上可享360度景觀。而目前嘅玉桂山其實並非完整嘅玉桂山，因為東面山坡已經削走，建成利東臨時房屋，後來再演變成利東邨。

由玉桂山繼續下行，可以通往鴨脷排，即係全島最南端位置，不過路段陡峭，十分崎嶇難行，碎石繁多，需要穿過中間潮退限定嘅連島沙洲，都算係居民嘅後花園。

鴨脷排位於玉桂山以南，係另一個小島嶼，有指面積只有0.092平方公里，潮退時先會同玉桂山相連，由利東邨直行至鴨脷排燈塔，粗略計算需要約2小時，連同原路回程需要約4小時。島上並無居民，但有一座著名嘅鴨脷洲燈塔，唔少攀爬至鴨脷排後，都會到小型碼頭同鴨脷排燈塔打卡。鴨脷排小島上可以更近距離直視南丫島、東博寮海峽，甚至可眺望銀洲、舂坎角方向。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 巴士路線96,97,98,171,671都可以直達利東邨。

❷ 玉桂山入口就鄰近麥記路口。

❸ 山路極崎嶇不平，而且沙石容易跣腳，故必須要有一對防滑行山鞋。

❹ 山路唔簡單，千祈唔好誤信他人說法，必須要裝備充足。

❺ 如果想綑邊行，就更加要有足夠裝備。

❻ 最好帶備行山手套。

❼ 就算山邊有繩索，都唔好完全依賴，要抓緊安全點，踩實落腳點先好繼續行。

❶ 記得自己垃圾自己帶走。

❷ 玉桂山至鴨脷排有一連島沙洲，記得事前要查清楚水漲水退時間，以免被困於鴨脷排一端。

❸ 走玉桂山及鴨脷排之後，必須原路離開。

❹ 從鴨脷排離開，的確可以綑邊折返玉桂山，時間係較快，但亦較危險。

EATWO

Miss A