重遊火車博物館第一代文青打卡點大埔富善街超神秘T形街牌隱藏生果檔！

如果提到香港早期嘅打卡點，火車博物館絕對係第一代嘅文青打卡點，雖然佔地不大，但就係初期拍拖兩個人嘅影相好去處。今次編輯就帶大家重遊香港鐵路博物館，發現有啲嘢唔同咗，同時喺火車博物館附近，原來重隱藏咗一塊隱藏式T形街牌，為大家揭開殖民時代街牌嘅神秒面紗。

大埔墟市中心嘅香港鐵路博物館毗鄰現時嘅火車路軌，係香港文化博物館嘅分館，由舊時大埔墟火車站改建成博物館，所以位置都係靠近現時嘅火車站。由於館內擺放咗舊有列車展品，新舊對比之下，恍如穿越今昔，兩代列車分別更明顯，你又鍾意舊火車定新火車設計呢？

火車博物館門口有舊火車站站牌，博物館其實早於殖民時代1910年落成，係第一代文青打卡點，亦係歷史地標。以前火車係叫做KCR，即九廣鐵路公司，只不過舊火車站於1983年停止運作，改為現時嘅大埔墟火車站，3年後舊址改為博物館用途，於1984年被列為法定古蹟。

重遊火車博物館，當然到展示用途嘅舊式火車車卡遊覽，當中包括退役車卡，以及經修復、翻新嘅車站建築。博物館中有兩截車卡擺放路軌上，以前只係能夠進入右邊嘅車卡，而左邊多數車卡都唔開放；但目前就可以全部進入，而其中一端更新增影片播放，講述鐵路史。

除咗車站建築，館內亦保留7輪車卡，另有手動、機動工程車，甚至蒸氣機火車頭、柴油機車，歷史車廂係唔少人嘅打卡點。其中一輛寫有「51」號嘅機車，亞歷山大（葛量洪）爵士號，以當時嘅港督葛量洪爵士及夫人命名，為全港首架採用柴油電動火車頭嘅火車，目前仍然擺放於路軌之上，數一數歷史已有逾60年，「51」嘅號碼的確好搶眼。

從博物館展示嘅車卡可以睇返以前嘅實體火車嘅車廂，每個車卡都係殖民時代製造，由1911年至1974年都有，懷舊味濃厚，每個地方皆充滿復古味，火車美觀而實用，十分安全。

遊覽火車博物館最大分別應該係唔俾攝錄影片，只准影相，而且有弓多保安員站崗；以往某國自由行嘅時候，編輯不單見好多人攝錄，而且喺料舊火車廂上面食橙。

走完火車博物館，編輯帶大家找尋大埔鬧市中更有歷史價值嘅地方，如果有留意eatwo嘅介紹，相信都知道編輯呢排唔係講郵筒就係講街牌。而大埔墟市內原來唔止遺留「廣福道」T形街牌，重有一個隱藏於街市嘅「富善街」T形街牌。

你大概未必估到一個殖民時代充滿意義嘅T形街牌竟然躲藏於富善街街市內，其實富善街只係一道全長僅150米嘅傳統街市，中間可見被列為法定古蹟嘅文武廟，街道歷史悠久，可追塑至清代光緒年間，原本叫太和市，係第一大墟市，只不過於30年代先易名為富善街。

於靠近大埔火車博物館嘅富善街一角，隱藏咗一塊舊式T形街牌，單看街頭畫而，你絕對估唔到呢個地方會有舊街牌。富善街一端入口有一間叫「祥興時菓」嘅老字號生果舖，表面平平無奇，其實內有乾坤，因為T形街牌就躲藏生果舖範圍，非常神秘！

生果舖其實係唯一一個地方仍然保留有建墟時嘅瓦頂，而生果舖之上嘅樓宇則毫無關係。呢塊神秘十足嘅T形街牌就位於生果舖大鐘嘅後面，目前其實只係見到一角，勉強見到「富善街」三字，而英文則只見到好少，連一隻完整嘅英文字都未能睇得清楚。

「富善街」T形街牌長期被店舖遮蔽，但仍舊難掩殖民地色彩，舊街牌排列方式係上英下中，呈T字形設計，係60年代前嘅產身物。呢種傳統街頭文物嘅特色重有以鐵鑄造，字粒式舖砌字體，簡單嚟講就係鐵框瓷製，就算經歷百年都仍然可以堅固如新，新式打印嘅街牌係難以取代。不過，香港變化太快，轉眼就變成另一個時空，街道又會變成新地方，今日隱藏，聽日隨時又會被消失。