大埔烏蛟鵬九担租起步闖深山營地！穿梭苗三古道石澗登三椏涌湖邊超迷你露營場

大埔區內有3個營地，都位於大美督一帶，其中涌背營地係最人滿為患嘅營地，因為既有景觀，交通又方便，而且洗手間、補給點等齊備；而烏蛟騰對出嘅降下坳營地亦係露營好去處，位置偏遠而有基本洗手間、補給點等設施，只係唔太收到電話訊號；至於剩下一個營地就位處深山之中，必須要步行45分鐘至1小時先可以抵達，既無補給點，交通亦不便，更無電話訊號，但若然想拍拖兩個人安靜享受露營樂趣，三椏涌營地就係好去處，只不過營位極少。

位於大美督盡頭嘅三椏涌營地，並非車輛可以到達嘅露營場，只有步行先能夠抵達，而且必須走45分鐘至1小時嘅山路，穿過烏蛟騰、苗三古道、苗三石澗、上苗田、下苗田，就會去到三椏涌一帶，營地只佔其中一個角落。

從大埔墟巴士總站出發，一程車能直抵烏蛟騰，如果你有留意eatwo嘅楓葉地圖介紹，必定知道鳥蛟騰點去。抵達烏蛟騰總站之後，依循印洲塘郊遊徑走，5分鐘就會到達烏蛟騰楓香位置。

繼續前行約15分鐘，會見到中途有分岔路同攔路柱，左邊可以前往犁三古道，而右邊則可以前往苗三古道，今回去營地就需要走右邊，中途經過上苗田至下苗田。

穿過攔路柱，自然踏上苗三古道，屬東北船灣郊野公園範圍內，沿途遍佈樹蔭，能走過古人以石塊舖砌嘅道路，沿途滿佈鵝卵石，可以前往一道淺澗。由攔路柱步行約15至20分鐘會到達苗山石澗，係舊九大石澗之一，當中更有一個心形壼穴，但簡單嚟講就係有人發現其形成心形，結果演變成影相位。

一直走苗三古道，都係依循山腰而漫行，經過石澗，穿梭蜿蜓山徑，近末端位置會見到赤紅色岩石，原來三椏涌一帶該種岩石已有億年歷史。由於岩石含有鐵質，經過氧化後嘅海岸岩石，自然逐漸轉成紅褐色，應該屬粉砂岩。想要繼續觀賞岩石，有時間可以繼續前往三椏村碼頭方向。

到達營地之前，會見到一個涼亭，但該路段沙泥比較濕潤，河谷內有紅樹林及各種生物，構成三椏村濕地，唔太容易走過，可能要比較小心留意潮汐漲退時間。

由石澗步行至營地，腳程約需要15至20分鐘，營地離三椏村碼頭約15分鐘步程，屬印洲塘海岸公園範圍，附近為紅樹林、濕地、池塘，亦有凹凸不平岩石構成奇特地質，原來該濕地物種豐富，亦可作生態遊。

三椏涌營地位於濕地之上，屬小型露營場，而且係一個極蚊型嘅營地，因為整個營地基本上只得2個營位，每個營位均有1個燒烤爐、晾衫架、污水穴及枱櫈。營地只有極少營位，2個營位分上下兩個區域，地面為泥地，並無草地，人流極少，由於位置偏遠，故環境十分僻靜。

營地一端可俯視下方山谷溪流，水流來自剛才經過嘅苗三石澗；另一端亦可眺望新界東北著名嘅吊燈籠山頂，該山頭海拔約有416米高，正對東面，係觀賞日出嘅好地方。營地小山崗近三椏灣，基本上被灣洲、娥眉洲、吉澳環抱，同時正對印洲塘海，景色優美，只不過營地範圍被林木遮擋，需要步行至其他地方先會望到海景。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 由大埔墟交通交匯處乘搭巴士路線275R或小巴路線20R，皆可直抵烏蛟騰，但巴士只於假日及公眾假期服務，車程約30分鐘，每班次相隔約15至20分鐘。

❷ 由郊遊徑入口進入，經苗三古道前往三椏涌營地，步程約45分鐘至1小時。

❸ 中途並無補給站，如果去營地，可能要行到三椏村碼頭一帶先有。

❹ 路段要經溪澗及石路，所以落雨前後都不宜步行。

❺ 營地有旱廁，只有一格。臨近夏天，營地有機會有蚊蟲。

❻ 若從荔枝窩碼頭出發，亦需要步行約50分鐘步程，但就可以經過補給點，亦可試農村菜。

❼ 營地之下有湖泊河流，但就屬鹹淡水交界，故不宜飲用，最好都係自攜食水。