從東涌上行昂坪市集，有兩條路線可以選擇，上次編輯已經走過石門甲道，穿梭地塘仔郊遊徑一段登上昂坪廣場、昂坪市集，觀望天壇大佛、寶蓮禪寺、心經簡林，今次講埋另外一段昂坪山徑，亦係最為人熟悉嘅昂坪360救援徑、昂坪棧道，可拍拖兩個人挑戰攀登連綿梯級，更可以從頂端近距離下瞰香港赤臘角機場跑道，就當望梅止渴啦。
延伸閱讀﹕遊東涌寺廟群山上靜土 石門甲行1小時直上昂坪營地 仰望人氣木刻群心經簡林
由東涌逸東邨起步，10分鐘可以轉入東梅古道入口，經過東涌侯王古廟後，步行約5分鐘就可以到達昂坪360救援徑入口。而以Google地圖嚟講，昂坪棧道就喺昂坪360救援徑之後，分別在於昂坪360救援徑為石砌梯級，而昂坪棧道就係木梯級，別具特色。
不過，其實昂坪360救援徑即係昂坪棧道，棧道前名就係叫救援徑。楚漢時期有一句「明修棧道，暗渡陳倉」，棧道係古時嘅建築通道，而昂坪棧道本身就係一道建築通道。於昂坪纜車通車前，工程人員都係使用救援徑作救援、逃生用途，只不過係後來設計師舖砌高架木板，最後正名為昂坪棧道。
經昂坪360救援徑、昂坪棧道攀登昂坪市集，拾級而上，絕對係體力、耐力挑戰，只有連綿梯級，而且並非新手路線，單單昂坪棧道都有5.7公里長，最高點海拔約600米，而昂坪棧道最低都有約400米高，為3至4星路線，走完全程的確要3至4小時，全程只係樓梯之旅，重點係無補給點，亦無退出點，只能夠原路折返或繼續前行至山頂。
沿昂坪棧道登山，謹記不時要回望背後風景，皆因梯級後為東涌新市鎮全景，亦可以眺望港豬澳大橋。而整段昂坪棧道都佈滿31支標距柱，當初用作工程定位，由東涌C00起步，終點為昂坪C30，每一條標距柱之間大概有約500米長。
纜車本身依山而建，救援徑同棧道都舖砌完善，全段山徑離纜車極接近，甚至會經過纜車底。一直循昂坪360救援徑攀登至海拔近400米高，就會到達昂坪360纜車3號塔，位置正正係昂坪棧道起點，步程需要約1小時，前方會見到木板舖砌嘅棧道。
一直沿木板道向前走就可以攀登至昂坪廣場，步程又需要另外約1小時，穿過長樓梯，中途會經過昂坪360纜車5號塔，可以轉往彌勒山郊遊徑，位置係棧道最高點，不過始後前往昂坪廣場仍有30分鐘步程，而彌勒山海拔則有約750米高。
而昂坪360纜車3號塔上方有一個小平台，其實係直昇機停機坪，從昂坪360救援徑、昂坪棧道接駁處上行1至2分鐘就可以抵達，位置可以稍作休息，亦可以仰望來回兩端嘅纜車車廂。而纜車另一端則可以近距離俯視香港赤臘角機場，宛如一個小型觀景台，總算為無得去旅行暫時解決吓思「鄉」之情。
由於當日天氣潮濕，地面開始愈見濕滑，無論木板、石砌步道都容易滑倒，為安全起見，所以編輯於小平台之後就原路折返東涌，未有經昂坪棧道攀登至昂坪廣場、昂坪市集，等待下一次從昂坪逆走。不過，從纜車3號塔旁邊所見，纜車融入雲霧之中，畫面非常罕見。
「兩隻嘢露吓營」是「E.A.Two 兩個人醫吓肚」的一個活動，以步行及搭車方式走勻全港41個官方露營地，記錄所有露營地資訊。
E.A.Tips :
❷ 昂坪360救援徑、昂坪棧道接駁處上行可通往直昇機停機坪，近距離望香港赤臘角機場。
❸ 注意昂坪棧道為木樓梯級，要避免濕氣重時步行，而救援徑亦為石級，兩者都會跣腳，要穿著防滑鞋。
❹ 整段通上昂坪嘅路都為上行樓梯，而且係無盡梯級，如果唔想行咁多樓梯，建議走石門甲路段上昂坪。
❺ 大嶼山巴士路線38號可以直達逸東邨，落車後向後面方向步行轉右可前往東梅古道入口。
❻ 樓梯級極多，謹記帶備充足糧水。
❼ 樓梯級鮮見樹蔭，陽光猛烈時記得做足防曬。
❽ 上行時回望可見東涌市景。
❾ 昂坪棧道盡頭可通往彌勒山、昂坪市集。
❿ 謹記自己垃圾自己帶走。
昂坪360救援徑
大嶼山
昂坪棧道
大嶼山